ذہنی سکون اور جسمانی صحت کیلئے روزانہ ورزش کو معمول بنائیں، ڈاکٹر عامر شہزاد

سیالکوٹ (اُردو پوائنٹ اخبارتازہ ترین - اے پی پی۔ 11 اگست2025ء) ذہنی دباؤ اور اس سے پیدا ہونے والے مضر اثرات سے بچاؤ کے لیے باقاعدہ ورزش کو زندگی کا لازمی جزو بنانا نہایت اہم ہے کیونکہ یہ نہ صرف ذہنی سکون کا باعث بنتی ہے بلکہ جسمانی صحت کو بھی بہتر بناتی ہے۔ ان خیالات کا اظہار سینئر میڈیکل آفیسر ڈاکٹر عامر شہزاد نے خواجہ صفدر میڈیکل کالج سیالکوٹ میں منعقدہ ایک خصوصی تقریب سے خطاب کرتے ہوئے کیا۔

تقریب کا انعقاد طلباء و طالبات میں صحت مند طرزِ زندگی کے فروغ اور ذہنی دباؤ کے خاتمے کے حوالے سے آگاہی فراہم کرنے کے لیے کیا گیا تھا۔ ڈاکٹر عامر شہزاد نے اپنے خطاب میں کہا کہ آج کے تیز رفتار اور مقابلہ جاتی دور میں ذہنی دباؤ ایک عام اور سنگین مسئلہ بن چکا ہے، جو محض نفسیاتی اثرات تک محدود نہیں رہتا بلکہ دل کی بیماریوں، ہائی بلڈ پریشر، ذیابطیس اور دیگر کئی امراض کا باعث بھی بن سکتا ہے۔

(جاری ہے)

انہوں نے کہا کہ روزانہ کم از کم تیس منٹ کی جسمانی سرگرمی، مثلاً چہل قدمی، جاگنگ، یوگا یا کسی بھی قسم کی ہلکی پھلکی ورزش، دماغ میں اینڈورفنز اور دیگر مثبت کیمیکلز کے اخراج کو بڑھاتی ہے جو خوشگوار مزاج اور ذہنی سکون فراہم کرتے ہیں۔ ان کا کہنا تھا کہ ورزش نہ صرف ذہنی دباؤ کم کرتی ہے بلکہ نیند کے معیار کو بہتر بنانے، قوتِ مدافعت کو بڑھانے اور توانائی میں اضافہ کرنے میں بھی مددگار ثابت ہوتی ہے۔

ڈاکٹر عامر شہزاد نے نوجوانوں پر زور دیا کہ وہ اپنی مصروفیات میں سے روزانہ ورزش کے لیے وقت ضرور نکالیں اور موبائل فون یا اسکرین کے حد سے زیادہ استعمال سے پرہیز کریں کیونکہ یہ عادات ذہنی دباؤ میں اضافے کا سبب بنتی ہیں۔ انہوں نے اساتذہ اور والدین کو بھی مشورہ دیا کہ وہ طلباء اور بچوں میں صحت مند سرگرمیوں کے فروغ کے لیے حوصلہ افزائی کریں۔

تقریب میں طلباء، اساتذہ اور فیکلٹی ممبران نے بڑی تعداد میں شرکت کی اور ڈاکٹر عامر شہزاد کی تجاویز کو نہ صرف سراہا بلکہ ان پر عمل درآمد کے لیے اپنے عزم کا اظہار بھی کیا۔ شرکاء نے اس موقع پر اس بات پر اتفاق کیا کہ ذہنی و جسمانی صحت ایک دوسرے سے جڑی ہوئی ہیں اور صحت مند معاشرہ اسی وقت ممکن ہے جب لوگ مثبت اور متوازن طرزِ زندگی اپنائیں۔