داتا علی ہجویریؒ کی زندگی اہلِ ایمان کیلئے مینارہ نور ہے‘ ڈاکٹر راغب حسین نعیمی

فکری انتشار سے بچنے کیلئے داتا علی ہجویری ؒ کو تعلیمات کواپنا یا جائے‘چیئرمین اسلامی نظریاتی کونسل

جمعہ 15 اگست 2025 18:00

داتا علی ہجویریؒ کی زندگی اہلِ ایمان کیلئے مینارہ نور ہے‘ ڈاکٹر راغب ..

لاہور (اُردو پوائنٹ اخبارتازہ ترین - این این آئی۔ 15 اگست2025ء) چیئرمین اسلامی نظریاتی کونسل علامہ ڈاکٹر راغب حسین نعیمی نے کہاہے کہ داتا علی ہجویریؒ کی زندگی اہلِ ایمان کیلئے مینارہ نور ہے،فکری انتشار سے بچنے کے لئے داتا علی ہجویری کو تعلیمات کواپنا یا جائے،آپ ؒ کے علم،عمل اوراخلاص سے لاکھوںلوگ اسلام سے روشناس ہوئے،آپ ؒ کی تعلیمات نہ صرف برصغیر بلکہ پوری امتِ مسلمہ کے لیے ہدایت، اخلاص اور روحانی پاکیزگی کا ذریعہ ہیں،برصغیر میں اسلام کے پھیلاؤ میں حضرت داتا گنج بخشؒ کا کردار سنگِ میل کی حیثیت رکھتا ہے، آپؒ نے ہندومت، بدھ مت اور دیگر مذاہب کے ماننے والوں کو محبت، کردار اور روحانی اثر سے اسلام کی طرف مائل کیا۔

ان خیالات کااظہار انہوں نے جامعہ نعیمیہ میں جمعة المبارک کے اجتماع سے خطاب کرتے ہوئے کیا۔

(جاری ہے)

انہوں نے مزید کہاکہ حضرت داتا گنج بخشؒ ایک جلیل القدر عالمِ دین، مفسر، محدث اور فقیہ تھے۔ آپؒ کی معروف تصنیف ’’کشف المحجوب‘‘ نہ صرف تصوف کی پہلی فارسی کتاب ہے بلکہ اسلامی عقائد، تصوف، علم، عمل اور اخلاق کا حسین امتزاج ہے۔ اس کتاب نے نسلوں کو راہِ ہدایت دکھائی ۔

آپؒ نے اپنی زندگی کو تزکیہ نفس، اخلاص، تواضع، خدمتِ خلق، اور اللہ کی محبت کے فروغ کے لیے وقف کر دیا۔آپؒ کے دربار پر آج بھی جو لوگ آتے ہیں، انہیں سکون، عاجزی اور اصلاحِ نفس کا پیغام ملتا ہے۔ہمیں حضرت داتا صاحبؒ کی تعلیمات کو نصاب، خطبات، اور معاشرتی تربیت کا حصہ بنانا چاہیے تاکہ نوجوان نسل اپنے روحانی سرمائے سے جُڑے اور فرقہ واریت، نفرت، اور شدت پسندی سے بچ سکے۔ حضرت داتا گنج بخشؒ کا فیض رہتی دنیا تک جاری رہے گا۔آپؒ کا مزار مبارک لاہور میں مرجعِ خلائق ہے، جہاں ہر مسلک و مذہب کے لوگ فیض حاصل کرتے ہیں۔