ایران نے سلامتی کے اجلاس پر اسرائیلی حملے اور صدر کے زخمی ہونے کی تفصیلات بتا دیں

پزشکیان اپنے پیروں پر تھے اور معمولی زخمی ہونے کے باوجود نسبتا مستحکم حالت میں تھے،محسن حاجی میرزائی

ہفتہ 16 اگست 2025 16:06

تہران (اُردو پوائنٹ اخبارتازہ ترین - این این آئی۔ 16 اگست2025ء)ایرانی صدر کے دفتر کے ڈائریکٹر محسن حاجی میرزائی نے 16 جون کو ہونے والے نیشنل سکیورٹی کونسل کے ہنگامی اجلاس پر اسرائیلی حملے کی تفصیلات اور حملے کے بعد مسعود پزشکیان کی حالت کے بارے میں تفصیلات سے آگاہ کیا ہے۔حاجی میرزائی نے کہا کہ کچھ قیاس آرائیوں کے برعکس وہاں کوئی پہلے سے تیار شدہ راستہ نہیں تھا اور "کنکریٹ کے ڈھانچے میں میزائل سے پیدا ہونے والے واحد سوراخ کو ہاتھوں سے کھولا گیا تاکہ حاضرین باہر نکل سکیں۔

(جاری ہے)

انہوں نے مزید کہا کہ پزشکیان اپنے پیروں پر تھے اور معمولی زخمی ہونے کے باوجود نسبتا مستحکم حالت میں تھے۔حاجی میرزائی نے مسلح افواج کے چیف آف سٹاف عبدالرحیم موسوی کے زخمی ہونے کا بھی ذکر کیا۔ موسوی کو 13 جون کو اسرائیل کے ہاتھوں محمد باقری کے قتل کے بعد تعینات کیا گیا تھا۔ انہوں نے بتایا کہ پزشکیان کے ایک ساتھی کو دھول سونگھنے کی وجہ سے سانس لینے میں دشواری کا سامنا کرنا پڑا تھا۔انہوں نے مزید وضاحت کی کہ اگلے دن میڈیکل ٹیم نے صدر کے جسم میں جمع ہونے والے خون کا کچھ حصہ نکالا تھا۔ انہوں نے کہا کہ حملے کے بعد پزشکیان اپنی اسی جسمانی حالت میں رہبر اعلی علی خامنہ ای سے ملنے گئے۔