کھجور کاپھل ستمبر کے آغاز میں تیار ہو جائے گا، جدید ٹیکنالوجی سے اسے 10 سال تک ذخیرہ کیاجاسکتاہے،ماہر اثمار ڈاکٹر طلعت حسین

منگل 19 اگست 2025 16:26

فیصل آباد (اُردو پوائنٹ اخبارتازہ ترین - اے پی پی۔ 19 اگست2025ء) ڈیٹ پام ریسرچ کے ماہراثمارڈاکٹر طلعت حسین نے کہا ہے کہ مارچ اور اپریل کے مہینوں میں کھجور کے درختوں پر لگنے والے پھول کے باعث اگست کے آخر میں پھل پکنا شروع ہو جاتاہے ، ستمبرکے آغاز میں کھجور کاپھل اچھی طرح اور مکمل طور پر پک کر تیار ہو جائے گا جسے جدید ٹیکنالوجی کے استعمال سے 10 سال تک کےلئے بھی ذخیرہ کیاجاسکتاہے۔

ایک بیان میں انہوں نے کہا کہ جوں جوں گرمی کی شدت میں اضافہ ہوتاہے کھجور جلد سے جلد پک کر تیار ہونا شروع ہوجاتی ہے۔ انہوں نے کہا کہ کھجور ایک ایسا انمول تحفہ ہے جسے خشک کرکے بھی کئی سالوں کیلئے ذخیرہ کیاجاسکتاہے۔ ان کا کہنا تھا کہ کھجور کی افادیت اپنی جگہ اس کے درخت بھی بہت اہم خواص کے حامل ہوتے ہیں، کھجور کے تنے میں گھاؤ لگایاجائے تو اس سے انتہائی لذیز اور خوشبودار مواد برآمد ہوتاہے، اسے عموماً اس وقت پیا جاتاہے جب اسے نکالاجائے۔

(جاری ہے)

انہوں نے کہاکہ اگر تنے سے نکلے ہوئے مواد کو ایک دن کےلئے رکھ دیاجائے تواگلے روز لذیز اور خوشبودار موادمشروب کی صورت اختیار کر لیتاہے۔انہوں نے کہاکہ کھجور کے پیڑ سے نکلنے والے گوند کو بیرونی چوٹوں کےلئے استعمال کیاجاتا ہے جبکہ گھٹنے پر بیرونی چوٹ کےلئے استعمال کی صورت میں بھی زبردست افاقہ حاصل ہوسکتاہے۔