سال 2050 میں دنیا کی آبادی 9ارب سے تجاوز کر جائے گی، غذائی ضروریات پوری کرنے کیلئے اعلیٰ ترین اہداف تک پہنچنا ہو گا،ڈاکٹر ذوالفقار علی

پیر 15 ستمبر 2025 15:08

فیصل آباد (اُردو پوائنٹ اخبارتازہ ترین - اے پی پی۔ 15 ستمبر2025ء) جامعہ زرعیہ فیصل آباد کے وائس چانسلر پروفیسر ڈاکٹرذوالفقار علی نے کہا ہے کہ سال 2050 میں دنیا کی آبادی 9ارب سے بھی تجاوز کر جائے گی جس کی مناسبت سے غذائی ضروریات پوری کرنے کیلئے زرعی سائنسدانوں کو دستیاب زمینی و آبی وسائل سے استفادہ کرتے ہوئے زرعی اجناس کی پیداواریت کو اعلیٰ ترین اہداف تک پہنچانا ہو گا۔

(جاری ہے)

ایک ملاقات کے دوران انہوں نے کہاکہ غذائی ضروریات کے حوالے سے زرعی جامعہ نے زرعی پیداوار میں شاندار اضافہ کیلئے ایک پروگرام ترتیب دیا ہے جس کے تحت بعض دیگر اداروں کے اشتراک سے صوبہ بھر کے تمام اضلاع میں کسانوں کو زمین کی ذرخیزی، کھادوں کے استعمال، موسمی تبدیلیوں کے تناظر میں پیداواری منصوبوں کی ازسرنو تشکیل، مشینی کاشت کے نئے انداز اور ویلیوایڈیشن کے ساتھ ساتھ مارکیٹنگ کے سلسلے میں تربیت فراہم کی جائے گی۔ انہوں نے کہاکہ اس سلسلہ میں جلدکسان میلوں اور تربیتی سیمینارز کا بھی اہتمام کیاجائے گا تاکہ زرعی سائنسدان براہ راست کسانوں کیساتھ باہمی رابطے کے ذریعے ان کے مسائل کے حل اور ملک میں زرعی ترقی کے اہداف حاصل کرنے میں اپنا بھرپور کردار ادا کر سکیں۔