شیخوپورہ ،خوراک سے منسلک 116 کاروباروں کا معائنہ ، 2 لاکھ 5 ہزار روپے سے زائد کا جرمانہ عائد

منگل 16 ستمبر 2025 16:48

شیخوپورہ (اُردو پوائنٹ اخبارتازہ ترین - اے پی پی۔ 16 ستمبر2025ء) ڈائریکٹر جنرل فوڈ اتھارٹی پنجاب محمد عاصم جاوید اور ڈپٹی کمشنر شیخوپورہ شاہد عمران مارتھ کی ہدایات پر پنجاب فوڈ اتھارٹی شیخوپورہ کی فوڈ سیفٹی ٹیمیں معیاری خوراک کی فراہمی کو یقینی بنانے کے لئے فیلڈ میں مکمل متحرک ہیں ، ضلع بھر میں خوراک سے منسلک 116 کاروباروں کا معائنہ کیا گیا ، حفظان صحت کے اصولوں کی خلاف ورزی اور صفائی کے ناقص انتظامات پر 2 لاکھ 5 ہزار روپے سے زائد کا جرمانہ عائد کیا معیاری دودھ کی فراہمی کو یقینی بنانے کے لئے ضلع شیخوپورہ کے مختلف علاقوں میں چیکنگ کے دوران 51 ہزار 490 لٹر دودھ کو چیک کیا گیا- دودھ کو دودھ کے معیار کے مطابق نہ ہونے پر 145 لیٹر دودھ کو موقع پر تلف کیا گیا ۔

مزید براں مضر صحت غیر معیاری اور ممنوع زائد المیعاد اشیاء خورد نوش جن میں 15.068 لیٹر جعلی کاربونیٹیڈ مشروبات ، 230 لیٹر سیرپ ، 80 کلو بوتلوں کے ڈھکن ، 50 کلو لیبل ، 3.200خالی بوتلیں ، 40 لیٹر فلیور اور کیمیکلز ، 50 کلو شوگر ، 40 لیٹر جوس ، 0.369 کلوگرام دیگر زائد المیعاد اشیاء اور بیکری آئٹمز کو موقع پر تلف کیا گیا۔

(جاری ہے)

2 فوڈ پوائنٹ کو سیل کیا گیا اور 3 فوڈ پوائنٹ مالکان کے خلاف مقدمہ درج کروایا گیا اور متعدد فوڈ پوائنٹس کو اصلاحی نوٹس بھی جاری کیے گئے۔

ڈپٹی کمشنر شیخوپورہ شاہد عمران مارتھ نے پنجاب فوڈ اتھارٹی کی ٹیموں کی مضر صحت اشیاء کی خریدوفروخت کرنے والوں کے خلاف کاروائیوں بارے گفتگو کرتے ہوئے کہا کہ عوام الناس کو صاف ستھری خوراک کی فراہمی پنجاب فوڈ اتھارٹی کی اولین ترجیح ہونی چاہیے، پنجاب فوڈ اتھارٹی ہمیشہ کی طرح لوگوں کو صاف ستھری اور معیاری خوراک کی فراہمی کے لیے دن رات کوشاں ہے ۔\378