جمشید دستی کی نااہلی کے خلاف درخواست ، جواب جمع کروانے کے لئے آئندہ سماعت تک مہلت

منگل 16 ستمبر 2025 14:55

لاہور (اُردو پوائنٹ اخبارتازہ ترین - این این آئی۔ 16 ستمبر2025ء) لاہور ہائیکورٹ نے سابق رکن قومی اسمبلی جمشید دستی کی نااہلی کے خلاف درخواست پر سپیکر قومی کے وکیل کو جواب جمع کروانے کے لئے آئندہ سماعت تک مہلت دے دی۔چیف جسٹس لاہور ہائیکورٹ مس عالیہ نیلم کی سربراہی میں جسٹس حسن نواز مخدوم اور جسٹس خالد اسحاق پر مشتمل تین رکنی فل بینچ نے سابق رکن قومی اسمبلی جمشید دستی کی نااہلی کے خلاف درخواست پر سماعت کی ۔

سماعت کے دوران جمشید دستی اپنے وکیل اشتیاق اے خان کے ہمراہ عدالت میں پیش ہوئے۔چیف جسٹس عالیہ نیلم نے استفسار کیا کہ سپیکر کی طرف سے کون پیش ہوا ہی ۔سپیکر کے وکیل نے عدالت سے کہا کہ وکالت نامہ اور جواب جمع کرانے کے لیے مہلت دی جائے کیونکہ ہمیں نوٹس گزشتہ روز ہی موصول ہوا ہے۔

(جاری ہے)

چیف جسٹس نے ریمارکس دیئے کہ اس نظام کو معمولی نہ سمجھا جائے، اسی وجہ سے عدالت نے انتخابی عمل روکا ہے۔

لوگوں کا حق ہے کہ وہ اپنے نمائندے کا انتخاب کریں۔ چیف جسٹس نے مزید کہا کہ اٹارنی جنرل کو تحریری جواب جمع کرانے کا کہا تھا۔ایڈیشنل اٹارنی جنرل نے عدالت کو آگاہ کیا کہ اٹارنی جنرل کا تحریری جواب آج جمع کرا دیا گیا ہے۔ اس پر جمشید دستی کے وکیل اشتیاق اے خان نے کہا کہ مجھے تو اس جواب کی کاپی ابھی عدالت میں ملی ہے۔الیکشن کمیشن کے وکیل عمران عارف رانجھا نے بھی اپنا جواب عدالت میں جمع کروا دیا۔ عدالت نے فریقین کے دلائل سننے کے بعد کیس کی مزید سماعت ایک ہفتے کے لیے ملتوی کر دی۔