برطانوی سامراج کیخلاف جنگ آزادی میں علماء نے سینہ سپر ہوکر مقابلہ کیا مگر اصولوں پر سمجھوتہ نہیں کیا،سینیٹر مولانا عبدالواسع

کوئٹہ(اُردو پوائنٹ اخبارتازہ ترین - این این آئی۔ 16 ستمبر2025ء)ا میر جمعیت علماء اسلام بلوچستان سینیٹر مولانا عبدالواسع نے اپنے بیان میں کہا کہ جمعیت علماء اسلام کا نصب العین وہی عظیم مقاصد ہیں جو ہمارے اکابرینِ ملت، حضرت مولانا قاسم نانوتوئی، حضرت مولانا راشد احمد گنگوئی اور شیخ الہند مولانا محمود الحسن نے ہمیں سونپے۔ ان اسلاف کی زندگیوں سے ہمیں یہ درس ملا کہ حق کی راہ میں مصلحت اور مفاہمت نہیں بلکہ اپنے موقف پر غیر متزلزل رہنا ہی اصل کمال ہے۔

یہی وہ شعار ہے جو ہمیشہ ہماری پہچان رہا ہے اور اسی کی بنیاد پر ہم نے قربانیوں سے کبھی دریغ نہیں کیا برطانوی سامراج کے خلاف جنگِ آزادی میں ہمارے علماء نے سینہ سپر ہوکر مقابلہ کیا، قید و بند کی صعوبتیں برداشت کیں مگر اصولوں پر سمجھوتہ نہیں کیا۔

(جاری ہے)

پاکستان کی تشکیل میں بھی علماء کا کردار نمایاں اور ناقابلِ فراموش ہے، اور آج بھی ہم وطنِ عزیز کے دفاع اور اس سے محبت کو اپنے ایمان کا حصہ سمجھتے ہیں۔

ہماری سیاست کرسی اور اقتدار کی غلام نہیں بلکہ ملک و ملت کے استحکام اور ترقی کو فوقیت دیتی ہے۔انہوں نے کہا کہ جمعیت علماء اسلام نے ہمیشہ اسلام، مرکزِ اسلام اور جزیرہ عرب کے تقدس، شعائرِ اسلام کے تحفظ اور اسلامی ملت کو لاحق خطرات کے خلاف صفِ اوّل میں کھڑے ہوکر رہنمائی فراہم کی ہے۔ مسلمانوں کے مذہبی اور وطنی حقوق کے حصول و تحفظ، علماء کو ایک مرکز پر جمع کرنے، شرعی تنظیم اور محاکمِ شرعیہ کے قیام، اور شرعی نصب العین کے مطابق مکمل آزادی کے لیے ہماری جدوجہد مسلسل رہی ہے۔

دینی، تعلیمی، اخلاقی اور معاشرتی اصلاح کے لیے ہم نے ہر دور میں کوششیں کی ہیں اور اندرونِ ملک اسلامی تبلیغ و اشاعت کو اپنی استطاعت کے مطابق جاری رکھا ہے۔ اسی طرح عالمِ اسلام اور دیگر ممالک کے مسلمانوں سے اخوت و اتحاد کے رشتوں کو مضبوط بنانے اور غیر مسلم برادرانِ وطن کے ساتھ شرعی حدود کے مطابق ہمدردی و اتفاق کو فروغ دینا بھی ہمارے بنیادی مقاصد میں شامل رہا ہے، اور یہ عہد آج بھی زندہ ہے۔

انہوں نے مزید کہا کہ یہ وہی جماعت ہے جس کے قائد مولانا مفتی محمود تھے اور آج ان کے صاحبزادے قائد ملت اسلامیہ مولانا فضل الرحمان ہیں۔ عربی مقولہ ہیخیر خلف لِخیر سلف یعنی نیک جانشین نیک پیشرو کا حقیقی وارث ہوتا ہے۔ آج مولانا فضل الرحمان کی قیادت میں جمعیت علماء اسلام کو ایسا رہنما ملا ہے جو اسلام، مدارس اور مساجد کا دفاع نہ صرف پارلیمنٹ کے ایوانوں میں کر رہا ہے بلکہ دنیا کو اعتماد کے ساتھ یہ واضح پیغام دے رہا ہے کہ اسلام آج بھی سب سے مقبول اور مقبول ترین دین ہے، اور پوری انسانیت کی رہنمائی کی بھرپور صلاحیت رکھتا ہے۔

اگر دنیا میں کوئی نظریہ انسانیت کو امن و سکون کا پیغام دے سکتا ہے تو وہ صرف اور صرف دینِ اسلام ہے۔ ہم ان طاقتوں کو خبردار کرتے ہیں جو آج بھی مہذب دنیا اور اکیسویں صدی میں خون بہا کر فتوحات حاصل کرنا چاہتے ہیں کہ ایسا طرزِ عمل انسانی ضمیر اور عالمی امن دونوں کے لیے زہرِ قاتل ہے۔مولانا عبدالواسع نے کہا کہ بدقسمتی سے صوبے کے غیر یقینی اور بحرانی حالات میں بھی جمعیت علماء اسلام نے اپنے تمام تر تحفظات کو بالائے طاق رکھتے ہوئے ہمیشہ دو قدم آگے بڑھا ہے اور بحرانوں سے نجات کے لیے سنجیدہ تجاویز پیش کیں، لیکن حکمران طبقہ، جو سیاست اور اقتدار کی ہوس میں ڈوبا ہوا ہے، ان تجاویز کو سنجیدہ نہ لے سکا۔

نتیجہ یہ نکلا کہ بحران اب پہاڑ بن کر ترقی اور امن کو مفلوج کر چکا ہے۔ جب تک حقیقی عوامی نمائندہ حکومت قائم نہیں ہوتی مسائل کم ہونے کے بجائے بڑھتے رہیں گے۔ اب صوبے کا مقدمہ عوامی نمائندوں کے ہاتھوں سے بھی نکلتا جا رہا ہے اور جتنا اس عمل میں تاخیر کی جاتی ہے حالات کو قابو کرنا اتنا ہی مشکل ہوتا جا رہا ہے۔ روزانہ کی بنیاد پر صوبہ سنگین اور المناک واقعات سے دوچار ہے۔

ایسی فضا میں ترقی اور میگا پروجیکٹس تو درکنار، عام انسان کے لیے زندگی گزارنا بھی دشوار سے دشوار تر ہوتا جا رہا ہے۔ انہوں نے کہا کہ یہ وقت ہے کہ ذاتی مفادات اور اقتدار کی ہوس کو دفن کرکے اجتماعی بصیرت کے ساتھ آگے بڑھا جائے۔ اگر ہم نے اتحاد و اتفاق کے ساتھ ملت و ملک کا مقدمہ نہ لڑا تو آنے والی نسلیں ہمیں معاف نہیں کریں گی۔