پانچویں اور آٹھویں کے بورڈ امتحانات کا شیڈول جاری

داخلہ فارم تین نومبر سے پندرہ نومبر 2025 تک جمع کرائے جا سکیں گے

منگل 16 ستمبر 2025 21:10

راولپنڈی(اُردو پوائنٹ اخبارتازہ ترین - این این آئی۔ 16 ستمبر2025ء)راولپنڈی کے سرکاری سکولوں میں زیر تعلیم طلبہ و طالبات کے لیے اہم اعلان سامنے آ گیا ہے۔ حکام نے تصدیق کی ہے کہ پانچویں اور آٹھویں جماعت کے بورڈ امتحانات سال 2026 سے شروع کیے جائیں گے، اس سلسلے میں داخلہ فارم تین نومبر سے پندرہ نومبر 2025 تک جمع کرائے جا سکیں گے۔امتحانی شیڈول کے مطابق پانچویں جماعت کے پیپرز نو فروری سے شروع ہوں گے، جبکہ آٹھویں جماعت کے امتحانات 16 فروری سے 24 فروری تک جاری رہیں گے۔

نتائج کا اعلان 31 مارچ کو کیا جائے گا۔یہ امتحانات پہلے پنجاب ایگزامینیشن کمیشن کے تحت منعقد ہوتے تھے، تاہم اب ذمہ داری پنجاب ایجوکیشن کریکولم ٹریننگ اینڈ اسیسمنٹ اتھارٹی (PECTA) کو سونپی گئی ہے۔

(جاری ہے)

حکام نے کہاکہ اس اقدام کا مقصد طلبہ کو اعلیٰ جماعتوں میں جانے سے قبل بورڈ طرز کے امتحانات کے لیے تیار کرنا ہے تاکہ تعلیمی معیار بہتر ہو سکے۔

دوسری جانب اساتذہ تنظیموں نے حکومتی فیصلے پر شدید تحفظات ظاہر کیے ہیں۔ یونین رہنماؤں کا مؤقف ہے کہ صرف سرکاری سکولوں کے طلبہ کو اس امتحان میں شامل کرنا ناانصافی ہے، جبکہ پرائیویٹ سکولوں کو استثنیٰ دے دینا پالیسی پر سوالیہ نشان ہے۔یونین رہنماؤں نے خدشہ ظاہر کیا کہ اگر خاص طور پر آٹھویں جماعت میں طالبات ناکام ہوئیں تو ڈراپ آؤٹ کی شرح میں اضافہ ہوسکتا ہے، جس سے تعلیمی میدان میں لڑکیوں کی شمولیت مزید متاثر ہوگی۔ ان کا کہنا تھا کہ حکومت کو یکساں تعلیمی پالیسی بنانی چاہیے، ورنہ یہ اقدام تعلیمی معیار بلند کرنے کے بجائے طلبہ میں ذہنی دباؤ اور تعلیمی عدم مساوات کو بڑھا دے گا۔