ایل این جی کی قیمت مقامی گیس کے مقابلے میں 65 فیصد زیادہ ہے، اوگرا

بدھ 17 ستمبر 2025 17:00

اسلام آباد (اُردو پوائنٹ اخبارتازہ ترین - این این آئی۔ 17 ستمبر2025ء)وفاقی حکومت نے مہنگی ایل این جی کو کھپانے کیلئے گھریلو صارفین کو نئے کنکشنز دینے کی اجازت تو دے دی، تاہم اوگرا کی جانب سے اعتراف کیا گیا ہے کہ ایل این جی کی قیمت مقامی گیس کے مقابلے میں تقریباً 65 فیصد زیادہ ہے۔آئل اینڈ گیس ریگولیٹری اتھارٹی (اوگرا) کی جانب سے اعتراف کیا گیا کہ مائع قدرتی گیس (ایل این جی) کی قیمت مقامی گیس کے مقابلے میں تقریبا 65 فیصد زیادہ ہے۔

یاد رہے کہ اس سے پہلے پاور ڈویڑن مہنگی ایل این جی لینے سے انکار کرچکی ہے، وزیر پیٹرولیم علی پرویز ملک نے وزیر بجلی اویس لغاری سے شکوہ کیا تھا کہ پلانٹس کے لیے بے پناہ درآمدی گیس منگوا کر پاورڈویژن اب نہیں لے رہا۔ترجمان اوگرا نے بتایا کہ ایل این جی مقامی گیس سے تقریبا 65 فیصد مہنگی ہے، ایل این جی طویل مدتی معاہدے کے تحت درآمد کی جارہی ہے۔

(جاری ہے)

ترجمان اوگرا کے مطابق پاکستان ہر ماہ ایل این جی کے 10 کارگو درآمد کرتا ہے، ملک میں مقامی گیس کی اوسط قیمت 1836.93 روپے فی ایم ایم بی ٹی یو ہے جب کہ ایل این جی کی اوسط قیمت 3034 روپے فی ایم ایم بی ٹی یو ہے۔وزیر توانائی اویس لغاری نے حال ہی میں ایک سوال پر مہنگی گیس نہ لینے سے متعلق جواب دیا تھا۔اویس لغاری نے درآمدی گیس نہ لینے کے وزیر پیٹرولیم علی پرویز ملک کے شکوے پر جواب دیتے ہوئے مہنگی درآمدی گیس لینے سے صاف انکار کیا تھا۔

اویس لغاری نے پیٹرولیم ڈویژن کو گیس معاہدوں پر نظرثانی کا مشورہ دیتے ہوئے کہا تھا کہ اگر گیس زیادہ آنے کے معاہدے ہوئے تھے تو نظرثانی ہی مستقل اور واحد حل ہے۔وفاقی وزیر نے کہا کہ اکنامک میرٹ آرڈر کو تبدیل کرنا گناہ کبیرہ سمجھتے ہیں، یہ نہیں کریں گے۔