موسم سرما میں موسم گرما کی اگیتی سبزیوں کی دستیابی کےلئے کاشتکار ٹنل فارمنگ کو فروغ دیں، عدیل احمد

جمعہ 19 ستمبر 2025 13:50

فیصل آباد (اُردو پوائنٹ اخبارتازہ ترین - اے پی پی۔ 19 ستمبر2025ء) ڈپٹی ڈائریکٹرمحکمہ زراعت توسیع فیصل آبادعدیل احمدنے کہا کہ درجہ حرارت کم ہونے کی وجہ سے موسم گرما کی اگیتی سبزیاں کھیت میں اگانا ممکن نہیں ہوتا لہٰذاموسم گرما کی اگیتی سبزیوں کی دستیابی کےلئے زمیندار ٹنل فارمنگ کا طریقہ اپنائیں۔انہوں نے کاشتکاروں سے کہا کہ وہ ٹماٹر، شملہ مرچ، سبزمرچ اور بینگن کی نرسری کی کاشت ستمبر کے آخر تک اور کھیرا،گھیا کدو، گھیا توری، کریلا، حلوہ کدو، چپن کدو، خربوزہ اور تربوز کی براہ راست کاشت نومبر کے آخرتک مکمل کرلیں۔

انہوں نے ٹنل کے کاشتکاروں کو سفارش کی کہ زیادہ پیداوار کے حصول کےلئے ٹنل کاشت طریقہ کو رواج دینے کی ضرورت ہے کیونکہ ٹنل میں کاشت کی گئی سبزیوں کی کاشت سے جہاں فی ایکڑ پیداوار میں اضافہ ہوتا ہے وہیں کاشتکار معاشی طور پر بھی مستحکم ہوتے ہیں۔

(جاری ہے)

انہوں نے بتایاکہ روایتی طریقہ کاشت کی نسبت بلند، واک ان ٹنل اور پست ٹنل میں کھیرا، ٹماٹر، شملہ مرچ، سبز مرچ، گھیا کدو، گھیا توری، کریلا، چپن کدو، حلوہ کدو، بینگن، تربوز اور خربوزہ کی سبزیاں کامیابی سے اگائی جارہی ہیں۔

انہوں نے کہاکہ ان ٹنل کے اندر کاشت کی گئی سبزیوں کو شدید سردیوں کے موسم میں انتہائی نگہداشت کےلئے پلاسٹک شیٹ سے ڈھانپ دیا جاتا ہے جس سے ٹنل کے اندر کا درجہ حرارت مناسب رہتا ہے۔انہوں نے کہاکہ سردی اور کورے کے باوجود ان سبزیوں کے پودوں کی بڑھوتری جاری رہتی ہے جس کے باعث یہ جلد تیار اور اچھے داموں میں فروخت ہوتی ہیں جس سے کاشتکاروں کو زیادہ منافع حاصل ہوتا ہے۔ انہوں نے پڑھے لکھے نوجوان کاشتکاروں کو مشورہ دیا کہ وہ ٹنل فارمنگ پر مکمل دسترس کے لیے عملی تربیت حاصل کریں۔