سعودی عرب،مکہ سے دنیا تک کے عنوان سے پانچویں حج کانفرنس و نمائش کا انعقاد 9 تا 12 نومبر جدہ سپرڈوم میں ہوگا

جدہ (اُردو پوائنٹ اخبارتازہ ترین - اے پی پی۔ 20 ستمبر2025ء) خادم الحرمین الشریفین شاہ سلمان بن عبدالعزیز کی سرپرستی میں سعودی وزارت حج و عمرہ اور ’خدمت ضیوف الرحمٰن پروگرام‘ کے اشتراک سے پانچویں حج کانفرنس و نمائش کا انعقاد 9 تا 12 نومبر 2025 جدہ سپرڈوم میں ہوگا جس کا عنوان ’مکہ سے دنیا تک‘ رکھا گیا ہے۔اخبار 24 کے مطابق گزشتہ کانفرنسوں کی کامیابیوں کو مدنظر رکھتے ہوئے اس مرتبہ بھی پروگرام ترتیب دیے گئے ہیں۔

پانچویں کانفرنس میں 80 سے زائد سیشنز اور 60 ورکشاپس ہوں گی جن میں دنیا بھر سے تعلیمی، تحقیقی، سفارتی اور حج امور کے ماہرین شریک ہوں گے ،اس کے علاوہ 2400 سے زائد افراد کو خصوصی تربیت بھی دی جائے گی۔چوتھی کانفرنس میں 137 ممالک سے 220 سے زائد اداروں نے شرکت کی جبکہ ایک لاکھ بیس ہزار سے زیادہ افراد نے شرکت کی تھی اور 670 سے زائد معاہدوں پر دستخط ہوئے جن کے اثرات گزشتہ حج سیزن میں خدمات کے معیار میں واضح طور پر نظر آئے۔

(جاری ہے)

کنگ عبدالعزیز فاؤنڈیشن (دارۃ )اس کانفرنس میں ایک سائنسی و ثقافتی فورم ’تاریخ حج و حرمین شریفین‘ کے عنوان سے منعقد کرے گی جس میں حج کی تاریخی، ثقافتی اور تمدنی جہت پر روشنی ڈالی جائے گی، اس فورم میں جدید ٹیکنالوجی کے ذریعے حج تجربات کو ڈیجیٹل شکل میں محفوظ کرنے پر بھی غور کیا جائے گا۔کانفرنس کے ساتھ ایک وسیع البنیاد نمائش کا بھی اہتمام کیا جائے گا جو 52 ہزار مربع میٹر پر پھیلی ہوگی جس میں 260 سے زائد قومی و بین الاقوامی ادارے شرکت کریں گے۔

نمائش میں ’انویویشن زون‘ بھی شامل ہوگا جہاں 15 نئی کمپنیوں اور نوجوان کاروباری افراد کو تین اہم چیلنجز کے تحت حج خدمات کے لیے تخلیقی حل پیش کرنے کا موقع دیا جائے گا۔وزارت حج و عمرہ کے مطابق یہ کانفرنس اور نمائش حج خدمات کے میدان میں ترقی، اختراع اور عالمی شراکت داری کے قیام کے لیے منفرد بین الاقوامی پلیٹ فارم ہے۔وزارت نے دنیا بھر کے ماہرین، محققین اور دلچسپی رکھنے والے افراد کو شرکت کی دعوت دیتے ہوئے کہا ہے کہ وہ درج ذیل ویب سائٹ کے ذریعے رجسٹریشن کرکے اس بین الاقوامی ایونٹ کا حصہ بنیں۔