فیصل آباد،کاشتکاروں کو مسور کی فصل کو نقصان رساں کیڑوں کے حملے سے محفوظ رکھنے کی ہدایت

پیر 22 ستمبر 2025 12:28

فیصل آباد (اُردو پوائنٹ اخبارتازہ ترین - اے پی پی۔ 22 ستمبر2025ء) جامعہ زرعیہ کے ماہرین زراعت نے کاشتکاروں کو مسور کی اچھی پیداوارکے لئے فصل کو نقصان رساں کیڑوں کے حملے سے محفوظ رکھنے کی ہدایت کی ہے۔ انہوں نے بتا یا ہے کہ ٹوکا اگتی ہوئی مسور کی فصل کے چھوٹے پودوں کو کاٹ کر کھاتا ہے جس سے پیداوار بری طرح متاثر ہو تی ہے۔انہوں نے بتا یا کہ چور کیڑے کی سنڈیاں دن کے وقت پودوں کے قریب چھپی رہتی ہیں اور رات کو چھوٹے پودوں کو کاٹ کر فصل کو نقصان پہنچاتی ہیں۔

(جاری ہے)

انہوں نے کہا کہ ان کے انسداد کے لئے ناقابل استعمال سبزیاں کاٹ کر شام کو ڈھیریوں کی صورت میں رکھ دی جائیں اور صبح ہو تے ہی ان ڈھیریوں کے نیچے چھپی ہو ئی سنڈیوں کو تلف کر دیا جائے۔انہوں نے کہا کہ فصل کے اگنے سے کٹائی کے مرحلہ تک کسی بھی وقت دیمک کا حملہ ہو سکتا ہے اور دیمک پودوں کی جڑوں پر حملہ آور ہوتے ہوئے زمین میں سرنگیں بنا لیتی ہے جس سے متاثرہ حملہ شدہ پودے سوکھ جاتے ہیں۔ انہوں نے کہا کہ اگر بروقت آبپاشی کر لی جائے تو دیمک کے حملہ سے کسی حد تک بچا جا سکتا ہے۔