سعودی عرب کے مفتی اعظم شیخ عبدالعزیز بن عبداللہ آل الشیخ انتقال کر گئے

منگل 23 ستمبر 2025 17:21

ریاض (اُردو پوائنٹ اخبارتازہ ترین - اے پی پی۔ 23 ستمبر2025ء) سعودی عرب کے مفتی اعظم شیخ عبدالعزیز بن عبداللہ آل الشیخ 82 سال کی عمر میں انتقال کر گئے۔الاخباریہ کے مطابق سعودی عرب کے دیوان شاہی کی طرف سے منگل کو مفتی اعظم شیخ عبدالعزیز بن عبداللہ آل الشیخ کے انتقال کا اعلان کیا گیا۔ان کی نماز جنازہ (آج ) منگل کو سعودی عرب کے دارالحکومت ریاض کی امام ترکی بن عبداللہ مسجد میں ادا کی جائے گی ۔

شیخ عبدالعزیز بن عبداللہ آل الشیخ کو 1999 میں سعودی عرب کے مفتی اعظم کے عہدے پر تعینات کیا گیا تھا۔ انہوں نے مملکت میں اعلیٰ ترین مذہبی سکالر کے طور پر خدمات انجام دیں، شریعت کی تشریح اور قانونی اور معاشرتی امور پر فتوے جاری کئے ۔ شیخ عبدالعزیز بن عبداللہ آل الشیخ نے ہیئت کبار العلما، علمی تحقیق و افتا کی عمومی صدارت اور مسلم ورلڈ لیگ کی اعلیٰ کونسل کے سربراہ کے طور پر بھی خدمات انجام دیں۔

(جاری ہے)

خادمِ حرمین شریفین شاہ سلمان بن عبدالعزیز آل سعود نے ان کی غائبانہ نمازِ جنازہ مکہ مکرمہ کی مسجد الحرام، مدینہ منورہ کی مسجد نبوی اور مملکت بھر کی تمام مساجد میں ادا کرنے کا حکم دیا ہے۔ سعودی عرب کے دیوان شاہی کی طرف سے جاری بیان میں کہا گیا ہے کہ ان کے انتقال سے مملکت اور اسلامی دنیا ایک جلیل القدر عالم دین سے محروم ہو گئی ہے، انہوں نے اسلام اور مسلمانوں کے لیے نمایاں خدمات انجام دیں۔خادمِ حرمین شریفین اور ان کے ولی عہد شہزادہ محمد بن سلمان بن عبدالعزیز آل سعود نے ان کے اہل خانہ، سعودی عوام اور اسلامی دنیا سے تعزیت کا اظہار کیا ہے۔واضح رہے کہ بطور مفتیِ اعظم شیخ عبدالعزیز بن عبداللہ آل الشیخ سعودی عرب میں مذہبی اختیار کے اعلیٰ ترین منصب پر فائز رہے ۔