’یہ اتفاق نہیں سازش ہے‘ امریکی صدر کا ایسکیلیٹر اور ٹیلی پرامپٹر کی خرابی کی تحقیقات کا مطالبہ

واشنگٹن ( اُردو پوائنٹ اخبارتازہ ترین۔ 25 ستمبر 2025ء ) امریکی صدر ڈونلڈ ٹرمپ کی جانب سے اقوام متحدہ کے جنرل اسمبلی اجلاس کے موقع پر ایسکیلیٹر اور ٹیلی پرامپٹر کی خرابی کے معاملے کی تحقیقات کا مطالبہ سامنے آگیا۔ غیرملکی نیوز ایجنسی کے مطابق امریکی صدر دونلڈ ٹرمپ نے اس حوالے سے یو این سیکرٹری جنرل کو ایک خط لکھا ہے جس میں انہوں نے قرار دیا کہ یہ اتفاق نہیں بلکہ سازش ہے، میری جنرل اسمبلی آمد کو 3 طرح سے سبوتاژ کیا گیا جس پر اقوام متحدہ کو شرم آنی چاہیئے۔

خط میں کہا گیا ہے کہ اقوام متحدہ کے ہیڈکوارٹر آمد پر صدر ٹرمپ اوران کی اہلیہ میلانیا کو اس وقت خفت اٹھانا پڑی تھی جب وہ ایسکیلیٹر پر سوار ہوئے تو وہ اچانک بند ہوگیا جس پر صدر ٹرمپ کو سیڑھیاں چڑھنا پڑگئیں، خطاب شروع کیا تو ٹیلی پرامپٹر بھی نہ چلا جس پر صدرٹرمپ مزید ناراض ہوئے اور خطاب صرف وہی لوگ ہال میں سن پائے جن کے پاس وہ ہیڈفونز تھے جن پر تقریر ترجمے کے ساتھ پیش کی جا رہی تھی۔

(جاری ہے)

یاد رہے کہ اقوام متحدہ کی جنرل اسمبلی میں امریکی صدر ڈونلڈ ٹرمپ اور خاتونِ اول میلانیا ٹرمپ کی آمد کے دوران ایسکیلیٹر اچانک رک گیا تھا، اس حوالے سے زیر گردش وائرل ویڈیو میں دیکھا گیا کہ امریکی صدر اور خاتونِ اول نے جیسے ہی ایسکیلیٹر پر قدم رکھا تو وہ چلتے چلتے اچانک رک گیا، تاہم خاتونِ اول نے بغیر کسی ناگواری کا اظہار کیے پُرسکون انداز میں سیڑھیاں چڑھنا شروع کردیں۔

وائٹ ہاؤس نے اس معاملے پر خدشہ ظاہر کیا کہ شاید ایسکیلیٹر کو جان بوجھ کر روکا گیا ہے، وائٹ ہاؤس کی پریس سیکریٹری کیرولین لیویٹ نے کہا کہ ’اگر اقوام متحدہ کے اندر کسی نے صدر اور خاتونِ اول کے قدم رکھتے ہی جان بوجھ کر ایسکیلیٹر کو روکنے کی کوشش کی تو اس فرد کو فوراً برطرف کرتے ہوئے تفتیش کے دائرہ کار میں لایا جانا چاہیئے‘۔اس کے جواب میں اقوام متحدہ کے سیکریٹری جنرل کے ترجمان سٹیفن دوجارک نے صحافیوں کو بتایا کہ تکنیکی جانچ میں یہ بات سامنے آئی ہے کہ ایسکیلیٹر رکنے کی اصل وجہ وائٹ ہاؤس کے ایک ویڈیو گرافر کی غیر ارادی حرکت تھی، جس نے اوپر موجود حفاظتی نظام کو متحرک کردیا، ایسکیلیٹر کے اوپری حصے میں نصب حفاظتی نظام اس لیے بنایا گیا ہے تاکہ کسی شخص یا چیز کے گیئرنگ میں پھنسنے یا کھینچے جانے سے بچاؤ کیا جا سکے، ویڈیو گرافر کی حرکت سے یہ حفاظتی نظام فعال ہو گیا جس کے باعث ایسکیلیٹر رک گیا۔