ڈیرہ اسماعیل خان میں منی بس کھائی میں جا گری، ایک ہی خاندان کے 11 افراد جاں بحق

وزیراعلیٰ خیبرپختونخواہ کا داناسر کے مقام پر پیش آئے حادثے پر گہرے دکھ اور افسوس کا اظہار، علی امین گنڈاپور کی جاں بحق افراد کے لواحقین سے دلی ہمدردی و تعزیت

ساجد علی جمعہ 26 ستمبر 2025 11:30

ڈیرہ اسماعیل خان میں منی بس کھائی میں جا گری، ایک ہی خاندان کے 11 افراد ..

ڈیرہ اسماعیل خان ( اُردو پوائنٹ اخبارتازہ ترین۔ 26 ستمبر2025ء ) ڈیرہ اسماعیل خان میں منی بس کھائی میں جاگری جس کے نتیجے میں ایک ہی خاندان کے 11 افراد جاں بحق ہوگئے۔ تفصیلات کے مطابق یہ افسوسناک واقعہ صوبہ خیبرپختونخواہ کے ضلع ڈیرہ اسماعیل خان کے علاقہ دانا سر کے مقام پر پیش آیا جہاں خانوزئی سے ڈیرہ اسماعیل خان آتے ہوئے گاڑی کھائی میں گرنے سے 11 افراد جاں بحق ہوگئے، ریسکیو حکام کا کہنا ہے کہ گاڑی بریک فیل ہونے کے باعث کھائی میں جا گری، حادثے میں جاں بحق 11 افراد کے علاوہ 3 زخمی بھی ہوئے۔

ریسکیو حکام نے بتایا کہ اس افسوسناک حادثے میں جاں بحق ہونے والے افراد کا تعلق ایک ہی خاندان سے تھا، حادثے کے نتیجے میں زخمی ہونے والوں میں دریا خان، احمد اور 10 سالہ یوسف شامل ہیں، زخمیوں اور تمام لاشوں کو ضابطے کی ضروری کارروائی کے بعد ہسپتال منتقل کر دیا گیا ہے۔

(جاری ہے)

بتایا گیا ہے کہ وزیراعلیٰ خیبرپختونخواہ علی امین گنڈاپور نے داناسر کے مقام پر حادثے پر گہرے دکھ اور افسوس کا اظہار کرتے ہوئے جاں بحق افراد کے لواحقین سے دلی ہمدردی و تعزیت کی، انہوں نے مرحومین کے ایصالِ ثواب اور زخمیوں کی جلد صحتیابی کیلئے دعا بھی کی، اس کے علاوہ وزیراعلیٰ خیبرپختونخواہ نے ضلعی انتظامیہ اور ریسکیو 1122 کو متاثرہ خاندانوں کو فوری امداد فراہم کرنے کی ہدایت کرتے ہوئے کہا کہ صوبائی حکومت دکھ کی اس گھڑی میں لواحقین کے ساتھ کھڑی ہے۔