کاشتکاروں کو منتخب کردہ زرعی زہروں کے طریقہ عمل اور فارمولیشن سے آگاہی ہونی چاہیے، محکمہ زراعت

جمعہ 26 ستمبر 2025 13:35

فیصل آباد (اُردو پوائنٹ اخبارتازہ ترین - اے پی پی۔ 26 ستمبر2025ء) محکمہ زراعت نے کاشتکاروں کو گندم، کپاس، مکئی، چاول، گنے کی فصلوں کو کیڑوں و بیماریوں سے بچانے کے لئے سفار ش کردہ زہروں کے مناسب استعمال کی ہدایت کی ہے۔ ڈائریکٹر محکمہ زراعت توسیع فیصل آباد خالد محمودنے کہا ہے کہ چونکہ مختلف اقسام کے کیڑے اور بیماریاں حملہ آور ہو کر قیمتی فصلوں کو ناقابل تلافی نقصان پہنچاتی ہیں لہٰذا کاشتکار اس ضمن میں کسی غفلت یاکوتاہی کامظاہرہ نہ کریں اور محکمہ زراعت کے فیلڈ سٹاف کی مشاورت سے بروقت سفارش کردہ زہروں کا سپرے یقینی بنائیں ۔

انہوں نے کہاکہ کاشتکاروں کو منتخب کردہ زہروں کے طریقہ عمل اور فارمولیشن سے بھی آگاہی ہونی چاہیے کیونکہ رس چوسنے یا کُتر کر کھانے والے کیڑوں کے لئے مختلف طرز عمل کی زہریں استعمال ہوتی ہیں نیزکاشتکاروں کو زرعی زہریں استعمال کرنے سے پہلے کیڑے کی معاشی حد بھی معلوم ہونی چاہیے اور یہ بھی علم ہونا چاہیے کہ کیڑے کی زندگی کا کونسا دورانیہ چل رہا ہے اور کس دورانیے پر سپرے کرنے سے اثر زیادہ ہوگا۔

(جاری ہے)

انہوں نے کہاکہ کاشتکار سپرے کرنے سے پہلے مشین کو اچھی طرح صاف کرلیں تاکہ مشین کے اندر پہلے سے استعمال کی گئی زہروں کا اثر ختم ہو جائے۔انہوں نے کہا کہ فصلوں پر زہروں کا سپرے مناسب طور پر کرنے کے لئے صحیح مشین اور نوزل استعمال کی جائے تاکہ زہر پاشی سے مطلوبہ نتائج حاصل ہو سکیں۔علاوہ ازیں سپرے پمپ کی پھوار مناسب ہو اور اچھی طرح پودوں پرپھیل سکے۔انہوں نے مزید کہاکہ کاشتکار نباتات کْش ادویات کا صرف اسی فصل پر سپرے کریں جس کے لئے سفارش کی گئی ہو۔