بلغاریہ اور جمہوریہ چیک کی ٹیمیں ایف آئی وی بی والی بال مینز ورلڈ چیمپئن شپ کے سیمی فائنل میں داخل

جمعہ 26 ستمبر 2025 13:35

منیلا (اُردو پوائنٹ اخبارتازہ ترین - اے پی پی۔ 26 ستمبر2025ء) بلغاریہ اور جمہوریہ چیک کی مردوں کی والی بال ٹیمیں ایف آئی وی بی والی بال مینز ورلڈ چیمپئن شپ کے سیمی فائنل رائونڈ میں پہنچ گئیں۔سپورٹس ویب سائٹ کے مطابق بلغاریہ کی ٹیم نے ایف آئی وی بی والی بال مینز ورلڈ چیمپئن شپ کے کوارٹر فائنل میں امریکا کو شکست دے کر ٹاپ فور رائونڈ کے لئے کوالیفائی کیا جبکہ جمہوریہ چیک کی مینز والی بال ٹیم نے کوارٹر فائنل میچ میں حریف ایران کی ٹیم کو ہرا کر سیمی فائنل رائونڈ کے لئے کوالیفائی کیا۔

ایف آئی وی بی والی بال مینز ورلڈ چیمپئن شپ میں کانٹے دار مقابلوں کا سلسلہ فلپائن میں اپنے عروج کو پہنچ چکا ہے۔ فلپائن کے شہر پاسے کے ایس ایم مال آف ایشیا ایرینامیں کھیلے گئے مینز والی بال ایونٹ کے کوارٹر فائنل رائونڈ میچ میں بلغاریہ کی ٹیم نے سخت مقابلے کے بعد حریف امریکا کی ٹیم کو 2 کے مقابلے میں 3 سیٹ سے ہرا دیا۔

(جاری ہے)

بلغاریہ کی فتح کا سکور25-21، 25-19، 17-25، 22-25، 13-15رہا۔

اسی طرح جمہوریہ چیک کی مینز والی بال ٹیم نے شاندار کارکردگی کا مظاہرہ کرتے ہوئے کوارٹر فائنل رائونڈ کے میچ میں حریف ایران کی ٹیم کو 1-3 سیٹ سے ہرا کر سیمی فائنل رائونڈ کے لئے کوالیفائی کیا۔ جمہوریہ چیک کی فتح کا سکور25-22، 25-27، 20-25، 21-25رہا۔ایف آئی وی بی والی بال مینز ورلڈ چیمپئن شپ کے پہلے سیمی فائنل میچ میں جمہوریہ چیک کا مقابلہ بلغاریہ سے ہوگا جبکہ دوسرے سیمی فائنل میچ میں پولینڈ اور اٹلی کی ٹیمیں آمنےسامنے ہوں گی ۔