Live Updates

سعید انور بننا تھا یہ تو سعید اجمل بن گیا،صائم ایوب کی بولنگ پر شائقین کے دلچسپ تبصرے

جمعہ 26 ستمبر 2025 20:17

دبئی (اُردو پوائنٹ اخبارتازہ ترین - این این آئی۔ 26 ستمبر2025ء)پاکستان کرکٹ ٹیم کے نوجوان بیٹر صائم ایوب ایشیا کپ میں بیٹنگ میں تو اپنی کارکردگی نہیں دکھا سکے تاہم انہوں نے اپنی بولنگ سے ٹیم کی جیت میں اہم کردار ادا کیا ہے۔ گزشتہ روز بھی بنگلادیش کے خلاف صائم ایک بار پھر صفر پر آٹ ہوگئے اور ایشیا کپ 2025 میں چوتھی بار بغیر کوئی رن بنائے پویلین لوٹے ۔

صائم ایوب نے ایک بار پھر شاندار بولنگ کرتے ہوئے بنگلادیش کے خلاف 2 وکٹیں لیں اور پاکستان کی جیت میں اہم کردار ادا کیا۔صائم کی بولنگ پرفارمنس دیکھ کر شائقین سوچنے پر مجبور ہوگئے ہیں کہ یہ ٹیم میں بطور بیٹر کھیل رہے یا بطور بولر ٹیم کا حصہ ہیں کیوں کہ رن ان سے بن نہیں رہے البتہ مخالف ٹیم کی وکٹیں اڑا رہے ہیں۔

(جاری ہے)

ایشیا کپ میں صائم نے بطور بیٹر 6 اننگز میں صرف 23 رنز اسکور کیے جبکہ بولنگ کی بات کریں تو وہ اب تک 6 میچز میں 8 وکٹیں حاصل کر چکے ہیں۔

صائم کی بولنگ پرفارمنس دیکھ کر سوشل میڈیا صارفین کی جانب سے دلچسپ تبصرے کیے گئے ۔صارفین کا خیال ہے کہ صائم ایوب کو بطور بیٹر دیکھ کر ایسا لگتا تھا کہ یہ نیا سعید انورہے لیکن جس طرح وہ بولنگ کررہا ہے وہ تو سعید اجمل بن گیا۔ شہزاد ملک نامی صارف نے ایکس پر لکھا کہ صائم کو سعید انور بننا تھا یہ تو سعید اجمل بن گیا۔میاں عمر نے لکھا کہ ہم صائم کو سعید انور سمجھے رہے تھے یہ تو سعید اجمل نکلا'۔ایک اور صارف نے ایکس پر پوسٹ کیا کہ صائم اگلا سعید انور نہیں بلکہ سعید اجمل ہے۔