کاشتکار گاجر کی بہتر فصل کے لئے 6 سے 8 کلو کلوگرام بیج فی ایکڑ استعمال کریں،محکمہ زراعت

جمعہ 26 ستمبر 2025 17:27

فیصل آباد (اُردو پوائنٹ اخبارتازہ ترین - اے پی پی۔ 26 ستمبر2025ء) نظامت زرعی اطلاعات محکمہ زراعت توسیع کے ترجمان نے کہا کہ کاشتکار لمبی جڑ والی فصل گاجر کی کاشت و اچھی پیداوارکے لئے گہری میرا و اگیتی پیداوار کے لئے ریتلی میراز مین کا انتخاب کریں ۔ انہوں نے کہاکہ گاجر دیگر اقسام کی زمین میں بھی کامیابی سے کاشت کی جاسکتی ہے لیکن مذکورہ کاشت کےلئے زمین کی تیاری انتہائی اہمیت کی حامل ہوتی ہے کیونکہ اگر زمین اچھی طرح تیار نہ ہو اور اس میں مٹی کے ڈلے اور گوبر کی کچی کھاد موجود ہو تو گاجر کی شکل و رنگت پوری طرح نشو ونما نہیں پاتی اس لئے زمین کو خوب گہرائی تک نرم و بھربھرا کرنے کےلئے وتر حالت میں تین سے چار مرتبہ گہرا ہل چلا کر سہاگہ دیناچاہیے۔

انہوں نے کہا کہ گاجر کی کاشت کے لئے ستمبر کا آخری عشرہ انتہائی موزوں ہے تاہم پچھیتی کاشت اکتوبر کے آخر تک جاری رکھی جاسکتی ہے کیونکہ 35 ڈگری سینٹی گریڈ یااس سے زیادہ درجہ حرارت پر بیج کااگاؤ صحیح نہیں رہتا۔

(جاری ہے)

انہوں نے کہاکہ کاشتکار ادارہ تحقیقات و سبزیاں فیصل آباد کے تجربات کی روشنی میں گاجر کی شاندار فصل کے لئے 6 سے 8 کلوگرام بیج فی ایکڑ استعمال کریں۔ انہوں نے کہاکہ گاجر 100 سے130روز میں پوری طرح تیار ہو جاتی ہے تاہم روز مرہ استعمال کے لئے 80 سے 90 دن کے بعد گاجر کی موٹائی 2 سے 4سینٹی میٹر ہونے پر بھی اسے برداشت کیاجاسکتاہے۔