پاکستانی نژاد ماہر ماحولیات انعم چوہدری کو سرکاری اوسلو ایوارڈ سے نواز دیا گیا

ہم سب پر ذمے داری عائد ہوتی ہے کہ آنیوالی نسلوں کیلئے ایک صاف، سرسبز اور محفوظ دنیا چھوڑ کر جائیں،انعم چوہدری

ہفتہ 27 ستمبر 2025 20:45

اوسلو(اُردو پوائنٹ اخبارتازہ ترین - این این آئی۔ 27 ستمبر2025ء)پاکستانی نژاد ماہر ماحولیات انعم چوہدری کو ناروے کے دارالحکومت اوسلو میں ماحولیات کے شعبے میں نمایاں خدمات انجام دینے پر سرکاری اوسلو ماحولیاتی ایوارڈ سے نوازا گیا ہے۔یہ ایوارڈ شہر کی جانب سے ماحولیات کے تحفظ اور پائیدار ترقی کیلئے سب سے بڑا اعزاز تصور کیا جاتا ہے۔انعم چوہدری کو یہ اعزاز اس بات کے اعتراف میں دیا گیا کہ انہوں نے اوسلو میں ماحولیات کے حوالے سے سبز اور پائیدار تبدیلی کے سفر کو آگے بڑھانے میں ناصرف پیشہ ورانہ سطح پر اہم کردار ادا کیا بلکہ ذاتی طور پر بھی ماحول دوست طرزِ زندگی اور پالیسیوں کے فروغ کے لیے نمایاں وکالت کی۔

شہر کی انتظامیہ کے مطابق انعم چوہدری کی کوششوں نے اوسلو کو ماحول دوست اقدامات میں عالمی سطح پر ایک مثالی مقام دلانے میں مدد دی ہے، ان کے منصوبوں نے ناصرف مقامی سطح پر کاربن اخراج میں کمی میں کردار ادا کیا بلکہ عوام کو پائیدار مستقبل کی اہمیت سے بھی آگاہ کیا۔

(جاری ہے)

انعم چوہدری نے ایوارڈ وصول کرتے ہوئے کہا کہ یہ کامیابی صرف ان کی ذاتی نہیں بلکہ اس مقصد کے لیے کام کرنے والے ہر شخص کی اجتماعی کاوشوں کا نتیجہ ہے۔

انہوںنے کہاکہ ہم سب پر ذمے داری عائد ہوتی ہے کہ آنے والی نسلوں کے لیے ایک صاف، سرسبز اور محفوظ دنیا چھوڑ کر جائیں۔ماہرین کے مطابق اوسلو ماحولیاتی ایوارڈ ان افراد اور اداروں کو دیا جاتا ہے جو ماحولیات کے تحفظ اور موسمیاتی تبدیلی کے خلاف عملی اقدامات کرتے ہیں اور معاشرے کو پائیدار ترقی کی طرف لے جانے میں نمایاں کردار ادا کرتے ہیں۔