مسور کے کاشتکار فصل کو زر رساں کیڑوں کے حملہ سے محفوظ رکھیں،محکمہ زراعت سمبڑیال

منگل 30 ستمبر 2025 11:34

سیالکوٹ (اُردو پوائنٹ اخبارتازہ ترین - اے پی پی۔ 30 ستمبر2025ء) اسسٹنٹ ڈائریکٹر پیسٹی سائیڈ اینڈ پلانٹ پروٹیکشن صباء تحسین نے کہا ہے کہ مسور کے کاشتکار اچھی پیداوارکے حصول کے لئے فصل کو زر رساں کیڑوں کے حملہ سے محفوظ رکھیں ۔انہوں نے کاشتکاروں کے نام اپنے پیغام میں کہا کہ ٹوکا اگتی ہوئی مسور کی فصل کے چھوٹے پودوں کو کاٹ کر کھاتا ہے جس سے پیداوار بری طرح متاثر ہوتی ہے۔

(جاری ہے)

انہوں نے بتایا کہ چور کیڑے کی سنڈیاں دن کے وقت پودوں کے قریب چھپی رہتی ہیں اور رات کو چھوٹے پودوں کو کاٹ کر فصل کو نقصان پہنچاتی ہیں۔انہوں نے کہا کہ ان کے انسداد کےلئے ناقابل استعمال سبزیاں کاٹ کر شام کو ڈھیریوں کی صورت میں رکھ دی جائیں اور صبح ہو تے ہی ان ڈھیریوں کے نیچے چھپی ہوئی سنڈیوں کو تلف کر دیا جائے۔انہوں نے کہا کہ فصل کے اگنے سے کٹائی کے مرحلے تک کسی بھی وقت دیمک کا حملہ ہو سکتا ہے اور دیمک پودوں کی جڑوں پر حملہ آور ہوتے ہوئے زمین میں سرنگیں بنا لیتی ہے جس سے متاثرہ حملہ شدہ پودے سوکھ جاتے ہیں۔ انہوں نے کہا کہ اگر بروقت آبپاشی کر لی جائے تو دیمک کے حملہ سے کسی حد تک بچا جا سکتا ہے۔