اماراتی وزٹ ویزہ قوانین میں ترامیم کے بعد اہم معلومات جاری

فیملی اور دوستوں کو سپانسر کرنے کیلئے کم از کم کتنی تنخواہ درکار ہوگی؟ نئی شرط کی تفصیل جاری

ساجد علی منگل 30 ستمبر 2025 17:01

اماراتی وزٹ ویزہ قوانین میں ترامیم کے بعد اہم معلومات جاری

دبئی ( اُردو پوائنٹ اخبارتازہ ترین۔ 30 ستمبر2025ء ) متحدہ عرب امارات کے وزٹ ویزہ قوانین میں ترامیم کے بعد اہم معلومات جاری کردی گئیں، نئے ضوابط میں مصنوعی ذہانت، تفریح، تقریبات، کروز شپ اور لگژری یاٹ کے ماہرین کے لیے وزٹ ویزہ کے چار نئے زمرے بھی متعارف کرائے گئے ہیں۔ خلیجی میڈیا کے مطابق متحدہ عرب امارات نے اپنے وزٹ ویزہ قوانین میں اپ ڈیٹس کی ایک سیریز کا اعلان کیا ہے، جس کے تحت چار نئے ویزہ زمرے متعارف کرائے گئے اور کئی موجودہ اجازت ناموں کے دورانیے اور شرائط میں ترامیم کی گئی ہیں، ان تبدیلیوں کے ایک حصے کے طور پر وفاقی اتھارٹی برائے شناخت اور شہریت، کسٹمز اور پورٹ سکیورٹی (ICP) نے یو اے ای کے رہائشیوں کے لیے ایک وزیٹر کی کفالت کے لیے کم از کم ماہانہ آمدنی کی شرط مقرر کی ہے۔

(جاری ہے)

بتایا گیا ہے کہ اپ ڈیٹ کردہ قوانین کے تحت فوری طور پر کنبہ کے افراد کو یو اے ای لانے کے خواہشمند رہائشیوں کو کم از کم 4 ہزار درہم ماہانہ کمانا ہوں گے، دوسرے یا تیسرے درجے کے رشتہ داروں کو سپانسر کرنے کے لیے ماہانہ تنخواہ کم از کم 8 ہزار درہم ہونی چاہیئے، جب کہ دوستوں کو سپانسر کرنے کی صورت میں کم از کم 15 ہزار درہم ماہانہ تنخواہ کی ضرورت ہوگی، کم از کم تنخواہ کی یہ شرط آئی سی پی کی متعارف کرائی گئی تبدیلیوں کے وسیع سیٹ کا حصہ ہے، جس کا مقصد شفافیت کو بڑھانا، معاشی تنوع کو سپورٹ کرنا اور باصلاحیت افراد کو متحدہ عرب امارات کی طرف راغب کرنا ہے۔

بتایا جارہا ہے کہ متحدہ عرب امارات کے وزٹ ویزہ کے چار نئے زمرے مصنوعی ذہانت، تفریح، تقریبات، کروز شپ اور تفریحی جہازوں کے ماہرین کے لیے متعارف کرائے گئے ہیں، اس کے علاوہ ایک انسانی بنیاد پر رہائشی اجازت نامہ ایک سال کی مدت کے لیے جاری کیا جائے گا، مخصوص شرائط کے ساتھ اتھارٹی کے فیصلے کے ذریعے اس میں توسیع بھی ہوسکے گی، یہ فیصلہ غیر ملکی بیواؤں یا طلاق یافتہ خواتین کو بھی سپانسر کے بغیر متحدہ عرب امارات میں رہائش حاصل کرنے کی اجازت دیتا ہے اسی مدت کے لیے تجدید بھی کرائی جاسکے گی۔