لاہور کا مطلع جزوی ابر آلود، درجہ حرارت 36 ڈگری تک جانے کا امکان

بدھ 1 اکتوبر 2025 17:39

لاہور(اُردو پوائنٹ اخبارتازہ ترین - آن لائن۔ 01 اکتوبر2025ء) لاہور کا مطلع آج جزوی ابر آلود ہے اور بادلوں نے سورج کی روشنی دھندلا دی ہے۔ محکمہ موسمیات کے مطابق شہر کا موجودہ درجہ حرارت 30 ڈگری سینٹی گریڈ ریکارڈ کیا گیا ہے جبکہ زیادہ سے زیادہ درجہ حرارت 36 ڈگری تک جانے کا امکان ہے۔ شہر میں 3 کلومیٹر فی گھنٹہ کی رفتار سے ہوائیں چل رہی ہیں اور آئندہ 24 گھنٹوں کے دوران بارش کا کوئی امکان نہیں۔

(جاری ہے)

شہر کی فضا بدستور آلودہ ہے اور ایئر کوالٹی انڈیکس کی شرح 160 ریکارڈ کی گئی ہے، جس کے باعث لاہور دنیا کے آلودہ ترین شہروں کی فہرست میں چھٹے نمبر پر آ گیا ہے۔ ماہرین کے مطابق شہریوں کو فضائی آلودگی سے بچنے کے لیے احتیاطی تدابیر اختیار کرنی چاہئیں۔دوسری جانب محکمہ موسمیات نے پیش گوئی کی ہے کہ آئندہ ایک سے تین گھنٹوں کے دوران دیر، سوات، بونیر، شانگلہ، بٹگرام، مانسہرہ، ایبٹ آباد، بری پور اور صوابی سمیت گردونواح میں تیز ہواوں اور گرج چمک کے ساتھ بارش کا امکان ہے۔ محکمہ موسمیات نے شہریوں کو ممکنہ بارش اور تیز ہواو ں کے پیش نظر احتیاطی تدابیر اختیار کرنے کی ہدایت کی ہے۔