جرمن شخص کی والدین پر فائرنگ کے بعد خودکشی، فیسٹیول کو دھماکے سے اڑانے کی دھمکی بھی دی

جمعرات 2 اکتوبر 2025 15:53

میونخ(اُردو پوائنٹ اخبارتازہ ترین - این این آئی۔ 02 اکتوبر2025ء) جرمنی میں ایک خاندانی المیے نے دنیا کے سب سے بڑے بیئر فیسٹیول اوکٹوبر فیسٹ کو سات گھنٹوں کے لیے بند کرا دیا۔پولیس کے مطابق 57 سالہ جرمن شخص نے بدھ کی صبح اپنے والدین پر فائرنگ کی، گھر میں دھماکا خیز مواد لگایا اور آگ لگا دی، جس کے بعد اس نے خودکشی کر لی۔حکام نے شبہ ظاہر کیا ہے کہ 90 سالہ والد اس واقعے میں ہلاک ہوئے ہیں تاہم ان کی لاش جلتے ہوئے مکان سے نکالی نہیں جا سکی۔

(جاری ہے)

واقعے کے بعد پولیس کو قریب ہی ایک خط ملا جس میں اوکٹوبر فیسٹ سے متعلق مبہم دھمکی دی گئی تھی۔ اس خط کے بعد فورا فیسٹیول بند کر کے پولیس نے کتے اور دھماکا خیز مواد کی تلاش کرنے والے یونٹس کے ساتھ پورے علاقے کی تلاشی لی۔میونخ کے میئر ڈیٹر رائٹر نے دوپہر میں عوام کو آل کلیئر دے دیا، جس کے بعد شام کو فیسٹیول دوبارہ شروع کر دیا گیا۔یہ واقعہ شہر کے شمالی علاقے لیرشنا میں پیش آیا، جس نے عوام اور حکام دونوں کو شدید تشویش میں مبتلا کر دیا۔