انڈسٹری میں شروعات میں رنگت اور باڈی شیمنگ کا سامنا رہا، رومیسہ خان

پیر 6 اکتوبر 2025 18:42

کراچی (اُردو پوائنٹ اخبارتازہ ترین - این این آئی۔ 06 اکتوبر2025ء) اداکارہ رومیسہ خان نے انکشاف کیا ہے کہ ابتدائی دنوں میں انڈسٹری میں رنگت اور باڈی شیمنگ کا سامنا کرنا پڑا۔ایک پوڈ کاسٹ میں گفتگو کرتے ہوئے رومیسا نے کہاکہ اپنے آپ کو ٹی وی پر دیکھتی ہوں تو کہتی ہوں کہ میں چبی آرہی ہوں میرا چہرا بہت چبی آرہا ہے لیکن کوئی کچھ نہیں کہتا۔انہوں نے بتایا کہ لیکن جب میں انڈسٹری میں نئی نئی آئی تھی تو لوگ میری رنگت کو لے کر باتیں بناتے تھے۔

ایک دو بار تو مجھے وزن کم کے لیے بھی کہا گیا۔اداکارہ نے کہا کہ سیٹ پر ہنسی مذاق میں سب کچھ کہہ دیا جاتا ہے، ایک بار ایک ہدایت کار نے سیٹ پر سب کے سامنے کہا کہ مجھے وزن کم کرنے کی ضرورت ہے، پھر سیٹ پر مذاق کرتے ہوئے کہہ دیا کہ اسے کھانا کس نے دیا، جب یہ حد سے گزر گیا تو مجھے رونا آگیا۔

(جاری ہے)

انہوں نے کہا کہ بعدازاں وہ ہدایت کار میرے پاس آئے اور مجھ سے معافی مانگی، تو میں نے کہہ دیا کہ آپ نے سب کے سامنے میرا مذاق اڑایا تھا تو معافی بھی سب کے سامنے مانگیں جس پر میں انہیں بری لگنے لگ گئی۔

رومیسہ نے کہا کہ یہ سب بالکل ابتدائی دنوں میں ہوا کرتا تھا اب وزن پر نہیں رنگت پر کہتے ہیں لیکن مجھے فرق نہیں پڑتا اتنا اعتماد آگیا ہے۔ اب تو کام بھی دیتے ہیں اور ایسی باتیں بھی بولتے ہیں لیکن پہلے سے کم اور ڈھکے چھپے الفاظ میں۔