سعودی عرب ، مسجد الحرام میں ازدحام کی صورتحال کا جائزہ لینے کے لیے انٹر ایکٹو سکرینیں نصب

منگل 7 اکتوبر 2025 08:20

ریاض (اُردو پوائنٹ اخبارتازہ ترین - اے پی پی۔ 07 اکتوبر2025ء) مسجد الحرام مکہ مکرمہ میں عمرہ زائرین کی سہولت کے لیے طواف بیت اللہ اور مسعی (صفا، مروہ) کے مقامات پر ازدحام کی براہ راست صورتحال کا جائزہ لینے کے لیے مختلف مقامات پر انٹر ایکٹو سکرینیں نصب کی گئی ہیں۔

(جاری ہے)

الاخباریہ کے مطابق ان سکرینوں پر طوافِ خانہ کعبہ کے براہ راست مناظر دکھائے جاتے ہیں، اس کا مقصد طواف کے لیے آنے والوں کو یہ سہولت فراہم کرنا ہے کہ وہ ازدحام کو دیکھتے ہوئے طواف کا آغاز کریں یا کچھ دیر انتظار کریں۔

مسجد الحرام کی انتظامیہ کی جانب سے سکرینز پر صورتحال دیکھ کر عمرہ زائر کو یہ فیصلہ کرنا آسان ہوجاتا ہے کہ وہ بالائی منزل کا رخ کرے یا رش کم ہونے کا انتظار کرے۔مانیٹرنگ سکرینز کی سہولت مسجد الحرام کے بیرونی دروازوں پر بھی ہے۔علاوہ ازیں مرکزی دروازوں پر خصوصی سگنلز کے ذریعے مسجد الحرام کے اندر گنجائش کے بارے میں معلومات فراہم کی جاتی ہے۔