فیصل آباد ،بکری پال حضرات کو جانوروں کو سال میں 3مرتبہ وسیع الاثر کرم کش ادویات پلوانے اورحفاظتی ٹیکے لگوانے کی ہدایت

پیر 13 اکتوبر 2025 15:05

فیصل آباد (اُردو پوائنٹ اخبارتازہ ترین - اے پی پی۔ 13 اکتوبر2025ء) محکمہ لائیو سٹاک فیصل آباد نے بکری پال حضرات کو سال میں 3مرتبہ وسیع الاثر کرم کش ادویات پلوانے اورحفاظتی ٹیکے لگوانے کی ہدایت کی ہے۔ ڈائریکٹر محکمہ لائیو سٹاک و ڈیری ڈویلپمنٹ فیصل آباد ڈویژن ڈاکٹرسید ندیم بدرنے کہا ہے کہ انتڑیوں کے زہر، متعدی نمونیا، منہ کا پکنا اور چیچک کے امراض بکریوں کی افزائش نسل متاثر کرتے ہیں اس لئے بکری پال حضرات کو اپنی جانوروں کو سال میں 3مرتبہ وسیع الاثر کرم کش ادویات پلوانی اور ویٹرنری ہسپتال سے حفاظتی ٹیکے لگوانے چاہئیں۔

انہوں نے کہا کہ بکری پال حضرات کو اکتوبر کے دوران بکریوں کی افزائش نسل کے لئے خصوصی اقدامات کرنے چاہئیں جن میں بکریوں کی افزائش کے ساتھ ساتھ انہیں بیماریوں سے بچانے کے لئے حفاظتی ٹیکے لگوانا بھی شامل ہے تاکہ دودھ کی پیداوار میں اضافہ کے ساتھ ساتھ معیاری گوشت کا حصول بھی ممکن ہو سکے۔

(جاری ہے)

انہوں نے بتایا کہ اعلیٰ نسل کی علاقائی بکریاں بیتل، ٹیڈی، دائرہ دین پناہ، ناچی وغیرہ پالنے سے بہتر نتائج حاصل ہو سکتے ہیں۔ انہوں نے کہا کہ اکتوبرکے دوران اعلیٰ صلاحیت کے حامل نر بکروں سے بکریوں کی نسل کشی کروانی چاہیے۔ انہوں نے کہا کہ جانوروں کو متوازن خوراک، سبز چارہ، صاف پانی کی فراہمی کے ساتھ ساتھ شدید موسمی اثرات سے بچانا بھی ضروری ہے۔