پی آئی ٹی بی کی جانب سے سروائیکل کینسر بارے آگاہی سیشن کا انعقاد

منگل 14 اکتوبر 2025 14:52

لاہور (اُردو پوائنٹ اخبارتازہ ترین۔ 14 اکتوبر2025ء) پنجاب انفارمیشن ٹیکنالوجی بورڈ کے زیر اہتمام ارفع سافٹ ویئر ٹیکنالوجی پارک میں PITB Connect360 Talk Series کے عنوان سے سروائیکل کینسر بارے آگاہی سیشن کا انعقاد کیا گیا جس کا مقصد خواتین میں صحت سے متعلق شعور دینا اور سروائیکل کینسر کی بروقت روک تھام کی اہمیت کو اجاگر کرنا تھا۔ مہمانِ خصوصی کنسلٹنٹ گائناکالوجسٹ اور ہیڈ آف ڈیپارٹمنٹ ریلوے کیرنز ہسپتال لاہور ڈاکٹر ماریہ آزاد نے خواتین شرکاء کو سروائیکل کینسر کے اسباب، علامات اور بچاؤ سے متعلق جامع پریزنٹیشن دی اور اس بات پر زور دیا کہ پنجاب حکومت کی جانب سے کم عمر بچیوں کی ویکسینیشن مہم کو کامیاب بنانے کیلئے عوامی سطح پر آگاہی نہایت ضروری ہے تاکہ اس مرض کے پھیلاؤ کو روکا جا سکے۔

(جاری ہے)

ڈاکٹر ماریہ آزاد نے مزید کہا کہ صحت مند طرزِ زندگی، باقاعدہ ورزش اور متوازن غذا قوتِ مدافعت کو مضبوط بناتی ہے جو بیماریوں کے خلاف ایک قدرتی ڈھال کا کام کرتی ہے۔ 'PITB Connect360‘ پی آئی ٹی بی کمیونیکیشن اینڈ کوآرڈینیشن وِنگ کا ایک اہم اقدام ہے جو ادارے کے ملازمین کو مصنوعی ذہانت اور ڈیجیٹل ورک پلیس کے تقاضوں سے ہم آہنگ کرنے کے ساتھ ساتھ ذہنی توازن، جسمانی صحت اور آن لائن تحفظ جیسے اہم پہلوؤں بارے بھی تربیت فراہم کرتا ہے۔

اس حوالے سے پی آئی ٹی بی چیئرمین فیصل یوسف کا کہنا تھا کہ سروائیکل کینسر جیسے حساس موضوعات پر آگاہی دینا نہ صرف خواتین کی صحت کے تحفظ کیلئے ضروری ہے بلکہ ایک ذمہ دار ادارے کے طور پر پی آئی ٹی بی کا فرض بھی ہے کہ اپنے ملازمین میں صحت و فلاح کے حوالے سے شعور اجاگر کرے۔