امریکا، روس پر دباؤ بڑھانے کے لیے اپنے جی سیون اتحادیوں کے ساتھ تعاون کرنے کے لیے تیار

بدھ 15 اکتوبر 2025 09:10

واشنگٹن (اُردو پوائنٹ اخبارتازہ ترین - اے پی پی۔ 15 اکتوبر2025ء) امریکی وزیر خزانہ اسکاٹ بیسنٹ نے واشنگٹن میں یوکرینی وزیرِ اعظم یولیا سِویریدینکو سے ملاقات کے دوران یقین دہانی کرائی ہے کہ امریکا، روس پر دباؤ بڑھانے کے لیے اپنے جی7 اتحادیوں کے ساتھ بھرپور تعاون کرنے کے لیے تیار ہے۔تاس کے مطابق امریکی محکمہ خزانہ کی جانب سے جاری بیان میں امریکا نے روس پر دباؤ کی مہم کو مزید تیز کرنے پر زور دیا اور خاص طور پر یورپی اتحادیوں سے مطالبہ کیا کہ وہ نہ صرف روس بلکہ اُن تمام معیشتوں کے خلاف بھی سخت اقدامات کریں جو روسی تیل خرید رہی ہیں۔

(جاری ہے)

ملاقات کے دوران بیسنٹ نے یوکرین کی جانب سے امریکہ-یوکرین تعمیرِ نو سرمایہ کاری فنڈ کی حمایت پر شکریہ بھی ادا کیا۔ یاد رہے کہ اس سے قبل یوکرینی صدر ولادیمیر زیلنسکی کے دفتر کے سربراہ آندری یرماک نے بتایا تھا کہ وزیرِ اعظم سِویریدینکو کی قیادت میں ایک اعلیٰ سطحی یوکرینی وفد امریکہ روانہ ہو رہا ہے، جہاں وہ ہتھیاروں کی فراہمی، فضائی دفاع کو مضبوط بنانے، اور حملہ آور صلاحیتوں میں بہتری کے معاملات پر تبادلہ خیال کرے گا۔ اس کے علاوہ، یوکرینی وفد سردیوں سے قبل توانائی کے شعبے میں تعاون کے امکانات پر بھی بات چیت کرے گا۔