چین میں 138 ویں کینٹن میلے کا آغاز ، 32 ہزار سے زائد کمپنیوں کی شرکت

بدھ 15 اکتوبر 2025 10:30

بیجنگ (اُردو پوائنٹ اخبارتازہ ترین - اے پی پی۔ 15 اکتوبر2025ء) چین کے شہر گوانگچو میں 138 ویں کینٹن میلے کا آغاز ہو گیا۔ سی جی ٹی این کے مطابق کینٹن میلہ 15 اکتوبر سے 4 نومبر تک تین مرحلوں میں منعقد ہورہا ہے، اس کینٹن میلے کا نمائشی رقبہ 1.55 ملین مربع میٹر تک پہنچ گیا ہے جس میں کل 74,600 بوتھ قائم ہیں اورنمائش میں حصہ لینے والی کمپنیوں کی تعداد 32ہزار سے زائد ہے، رقبے اور کمپنیوں کی تعداد کے لحاظ سے یہ ایک نیا ریکارڈ ہے۔

(جاری ہے)

کینٹن میلے کا پہلا مرحلہ 15 سے 19 اکتوبر تک منعقد کیا جائے گا جس کا تھیم جدید مینوفیکچرنگ ہے ۔ نمائش کے موضوعات میں صنعتی آٹومیشن اور ذہین مینوفیکچرنگ، نئی توانائی کی گاڑیاں اور سمارٹ ٹریول جیسی نئے معیار کی پیداواری صلاحیتیں شامل ہیں ۔ نمائش کا کل رقبہ 5.2 لاکھ مربع میٹر ہے، بوتھ کی تعداد 25 ہزار سے زیادہ ہے، اور تقریباً 12 ہزار کمپنیاں اس میں شرکت کر رہی ہیں۔138 ویں کینٹن میلے کے دوران گوانگچو بائیون ہوائی اڈے پر مسافروں کی بڑی تعداد میں آمدورفت کی توقع ہے۔ کینٹن میلے کے لیے بائیون ہوائی اڈے میں 6 خصوصی چینلز قائم کیے گئے ہیں تاکہ نمائش کنندگان کسٹم سے تیزی، موثر اور آسانی سے گزر سکیں۔