فیصل آباد،ربیع کے چارے برسیم کی پیداوار 50ٹن فی ہیکٹر تک پہنچ گئی

بدھ 15 اکتوبر 2025 16:50

فیصل آباد (اُردو پوائنٹ اخبارتازہ ترین - اے پی پی۔ 15 اکتوبر2025ء) ربیع کے چارے برسیم کی پیداوار 50ٹن فی ہیکٹر تک پہنچ گئی ہے ،کاشتکار جدید پیداواری ٹیکنالوجی کا استعمال کرکے اس پیداوار میں مزید اضافہ کر سکتے ہیں۔ریسرچ انفارمیشن یونٹ آری فیصل آباد کے مطابق برسیم کا تعلق چونکہ پھلی دار اجناس سے ہے اس لئے قدرت نے اس میں ہوا میں موجودنا ئٹروجن کو فکس کرنے اور پھراپنے اور بعد میں آ نے والی فصلوں کے استعمال کے قابل بنانے کی صلاحیت رکھتی ہے جس سے اندازہ ہوتا ہے کہ برسیم ایک دوہری افادیت والی فصل ہے جو چارے کے ساتھ ساتھ دوسری فصلوں کی پیداوار میں اضافہ کرتی ہے۔

انہو ں نے بتایاکہ چاول کے علاقے جہاں کا کراپنگ سسٹم چاول اور گندم ہے زمینوں کی ذرخیزی کو کم کر دیتا ہے لہٰذا فصلوں کے ردوبدل میں اگربرسیم کی فصل شامل کی جائے تو نہ صرف کاشتکار کی فی ایکڑ آمدنی بڑھائی جا سکتی ہے بلکہ زمین کی ذرخیزی بڑھانے سمیت اس کی ساخت بھی بہتر بنائی جا سکتی ہے۔

(جاری ہے)

انہوں نے بتایاکہ برسیم اپنے اندر پانی کو محفوظ کرنے کی صلاحیت رکھنے کے علاوہ زمین کے کلراٹھے پن کو دور کرنے میں بھی انتہائی معاون ثابت ہوا ہے۔

انہوں نے کہاکہ اگر برسیم کی فصل کے بعد چاول کاشت کیاجائے تو اس کی پیداوار میں 5 سے 6 من فی ایکڑ اضافہ ہوسکتا ہے۔ انہوں نے کہاکہ برسیم کے بعد کاشتہ فصلوں کی نائٹروجن والی کھادوں کی ضرورت میں خاطرخواہ کمی آجاتی ہے۔انہوں نے بتایاکہ یہ بات بھی مشاہد ے میں آئی ہے کہ جہاں پر کاشتکاروں نے فصلوں کے ردوبدل میں برسیم کی فصل شامل کی ہے وہاں تقریباً تمام قسم کی جڑی بوٹیاں کنٹرول ہو گئیں اور بعض جگہوں پر جڑی بوٹی مار ادویات کے استعمال کی ضرورت بہت کم پیش آئی اس لئے برسیم کی کاشت کاشتکاروں کےلئے کافی نفع بخش فصل ثابت ہوئی ہے۔ کاشتکار مزید رہنمائی یا معلومات کےلئے ماہرین زراعت کی خدمات سے استفادہ کر سکتے ہیں۔