یو ای ٹی لاہور اور پنجاب یونیورسٹی کے درمیان تعلیمی و تحقیقی تعاون کے فروغ کے لئے مفاہمتی یادداشت پر دستخط

بدھ 15 اکتوبر 2025 14:45

لاہور (اُردو پوائنٹ اخبارتازہ ترین - اے پی پی۔ 15 اکتوبر2025ء) یونیورسٹی آف انجینئرنگ اینڈ ٹیکنالوجی (یو ای ٹی) لاہور اور یونیورسٹی آف دی پنجاب (پی یو) لاہور کےدرمیان تعلیمی و تحقیقی تعاون کو فروغ دینے کے لئے مفاہمتی یادداشت پر دستخط کئے گئے۔ وائس چانسلر یو ای ٹی پروفیسر ڈاکٹر شاہد منیر (تمغہ امتیاز) اور وائس چانسلر پنجاب یونیورسٹی پروفیسر ڈاکٹر محمد علی نے معاہدے پر دستخط کیے۔

معاہدے کے تحت دونوں جامعات کے اساتذہ، محققین اور طلبہ کی تیار کردہ مصنوعات، تحقیق اور ٹیکنالوجی کو ایک دوسرے کے ساتھ شیئر کریں گی۔ترجمان یو ای ٹی لاہور کے مطابق معاہدے کے تحت دونوں ادارے ایک دوسرے کی تیار کردہ تحقیقی مصنوعات اور وسائل کو اکیڈمک، تحقیقی اور ترقیاتی مقاصد کے لئے استعمال کر سکیں گے۔

(جاری ہے)

یہ تعاون جامعات کے درمیان بین الشعبہ جاتی تحقیق، جدت اور وسائل کے بہترین استعمال کو فروغ دے گا۔

مفاہمتی یادداشت کے مطابق دونوں جامعات مشترکہ طور پر ورکشاپس، تربیتی سیشنز اور سیمینارز کا انعقاد کریں گی تاکہ تحقیقی صلاحیت میں اضافہ ہو اور علم و تجربات کا تبادلہ ممکن ہو سکے۔ اس تعاون کے تحت لیبارٹری آلات، ڈیٹا، پروٹوٹائپس اور دیگر تحقیقی مواد کو بھی باہمی اتفاق سے شیئر کیا جا سکے گا جبکہ دونوں اداروں کے انٹیلیکچوئل پراپرٹی رائٹس کا مکمل احترام کیا جائے گا۔

اس موقع پر وائس چانسلر یو ای ٹی نے کہا کہ یہ اشتراک اس حقیقت کو اجاگر کرتا ہے کہ جامعات کو چاہیے کہ وہ مسابقت کی بجائے اشتراک کے ذریعے جدت اور تحقیق کو فروغ دیں۔انہوں نے کہا کہ یو ای ٹی اور پنجاب یونیورسٹی مل کر ملک کو درپیش چیلنجز کے حل کے لئے تحقیق اور ٹیکنالوجی کی ترقی میں موثر کردار ادا کر سکتی ہیں۔وائس چانسلر پنجاب یونیورسٹی نے اس اقدام کو سراہتے ہوئے کہا کہ اس طرح کے تعلیمی روابط سرکاری جامعات میں علمی معیار میں بہتری، تحقیقی استعداد میں اضافہ اور باہمی تعاون کی فضا کو فروغ دیتے ہیں۔

یہ مفاہمتی یادداشت تین سال کے لیے موثر رہے گی اور باہمی اتفاق رائے سے اس میں توسیع کی جا سکے گی۔ دونوں جامعات نے معاہدے پر عمل درآمد اور نگرانی کے لئے مرکزی رابطہ افسران (فوکل پرسنز) بھی نامزد کیے۔