ڈونلڈ ٹرمپ کی فٹبال ورلڈکپ اور اولمپکس کی میزبانی بوسٹن اور لاس اینجلس سے منتقل کرنے کی دھمکی

جمعرات 16 اکتوبر 2025 08:40

واشنگٹن (اُردو پوائنٹ اخبارتازہ ترین - اے پی پی۔ 16 اکتوبر2025ء) امریکی صدر ڈونلڈ ٹرمپ نے کہا ہے کہ اگر ضرورت پیش آئی تو فٹبال کی عالمی تنظیم "فیفا" کے صدر جانی انفانتینو سلامتی کے خدشات کے باعث 2026 ورلڈ کپ کے میچ امریکی شہروں سے منتقل کرنے کی حمایت کریں گے۔العربیہ کے مطابق ٹرمپ نے وائٹ ہاؤس میں صحافیوں سے گفتگو کرتے ہوئے کہا "اگر کوئی شہر کارکردگی میں ناکام رہا یا مجھے کہیں سلامتی کا خطرہ محسوس ہوا، تو میں جانی انفانتینو کو فون کر کے کہوں گا کہ میچ کسی اور جگہ منتقل کر دیں گے اور وہ یہ کام بہت آسانی سے کر دیں گے۔

(جاری ہے)

صدر ٹرمپ نے مزید کہا کہ اگر ضرورت پڑی تو 2028 کے لاس اینجلس اولمپکس بھی منتقل کیے جا سکتے ہیں۔ ان کے مطابق "میں اولمپکس کے بارے میں بھی یہی بات کہہ سکتا ہوں، اگر مجھے لگا کہ لاس اینجلس تیاری کے لیے موزوں حالت میں نہیں ہے تو میں اسے کسی اور جگہ منتقل کر دوں گا۔ورلڈ کپ 2026 میں بوسٹن سات میچوں، سان فرانسسکو اور سیاٹل چھ جبکہ لاس اینجلس آٹھ میچوں کی میزبانی کرے گا۔امریکہ آئندہ سال یہ ٹورنامنٹ میکسیکو اور کینیڈا کے اشتراک سے منعقد کرے گا، لیکن زیادہ تر میچ امریکی شہروں میں کھیلے جائیں گے۔ اس بار ورلڈ کپ 48 ٹیموں پر مشتمل ہو گا۔