مودی کی ٹرمپ کو روس سے تیل نہ خریدنے کی مبینہ یقین دہانی پر بھارت کا ردِ عمل آگیا

جمعرات 16 اکتوبر 2025 14:30

واشنگٹن (اُردو پوائنٹ اخبارتازہ ترین - این این آئی۔ 16 اکتوبر2025ء) امریکی صدر ڈونلڈ ٹرمپ کے بھارتی وزیرِ اعظم نریندر مودی کے روسی تیل نہ خریدنے سے متعلق کیے گئے دعوے کے بعد بھارت نے اپنے ردِعمل کا اظہار کردیا۔غیر ملکی میڈیا رپورٹس کے مطابق بھارتی وزارتِ خارجہ نے اپنے مقف میں کہا ہے کہ اس کی توانائی کی پالیسی کا بنیادی مقصد قومی مفاد اور بھارتی صارفین کے مفادات کا تحفظ ہے۔

بھارتی وزارتِ خارجہ کا کہنا تھا کہ بھارت توانائی کی ایک بڑی منڈی ہے اور عالمی سطح پر بدلتی ہوئی توانائی کی صورتحال میں اس کی ترجیح ہمیشہ اپنے عوام کے لیے مستحکم قیمتیں اور محفوظ سپلائی کو یقینی بنانا رہی ہے۔ بھارتی حکومت کا کہنا تھا کہ تیل و گیس کی درآمدات سے متعلق پالیسی صرف اسی اصول کے تحت تشکیل دی جاتی ہے۔

(جاری ہے)

بھارتی وزارتِ خارجہ کے بیان میں مزید کہا گیا ہے کہ بھارت کی توانائی پالیسی کے دو بنیادی مقاصد ہیں جن میں مستحکم قیمتوں کا حصول اور سپلائی کا تسلسل ہے، جس کے لیے مختلف ممالک سے توانائی کے حصول کو یقینی بنانے پر توجہ دی جا رہی ہے تاکہ عالمی منڈی کی صورتحال کے مطابق فیصلے کیے جا سکیں۔

واضح رہے کہ بھارت کا یہ ردعمل امریکی صدر ڈونلڈ ٹرمپ کے حالیہ بیان کے بعد سامنے آیا ہے۔امریکی صدر نے اپنے بیان میں دعوی کیا تھا کہ بھارتی وزیرِ اعظم نریندر مودی نے اِنہیں یقین دلایا ہے کہ بھارت جلد روس سے تیل کی خریداری روک دے گا۔