ملک کے بالائی علاقوں میں برفباری سے سردی کی شدت مزید بڑھ گئی

گلگت میں برفباری کا سلسلہ پھر شروع، بابوسر، نانگا پربت اور بٹوگاہ کی چوٹیوں پر برفباری ، شہریوں کو غیر ضروری سفر نہ کر نے کی ہدایت

بدھ 5 نومبر 2025 12:42

گلگت /ناران(اُردو پوائنٹ اخبارتازہ ترین - این این آئی۔ 05 نومبر2025ء) گلگت بلتستان اور خیبرپختونخوا کے سیاحتی علاقوں میں برفباری سے سردی کی شدت میں مزید اضافہ ہوگیا جس کے باعث لکڑی کی قیمت بھی بڑھ گئی ،شہریوں نے گرم کپڑے نکال لئے ۔تفصیلات کے مطابق گلگت بلتستان کے پہاڑوں پر برفباری کا سلسلہ پھر شروع ہو گیا، بابوسر، نانگا پربت اور بٹوگاہ کی چوٹیوں پر برفباری کا سلسلہ وقفے وقفے سے جاری رہی تاہم ایک درجن سے زائد گاڑیاں برف میں پھنس گئیں۔

ادھر خیبر پختونخوا کے علاقے سوات، دیر اور کالام کے پہاڑوں پر بھی برفباری ہوئی جبکہ اپر ہزارہ ڈویژن میں موسم سرما کی پہلی بارش اور ژالہ باری سے سردی کی شدت میں اضافہ ہو گیا، دن کے وقت بھی رات کا سماں رہا۔ایوبیہ، نتھیا گلی اور چھانگلہ گلی سمیت بالائی گلیات میں 2 سے 3 انچ تک برف پڑ چکی ہے۔

(جاری ہے)

دوسری جانب مظفرآباد سے وادی نیلم تک بارش اور برفباری سیموسم مزید سرد ہوگیا، انتظامیہ نے شہریوں کو ہدایت کی ہے کہ خراب موسم کے دوران غیر ضروری سفر سے گریز کریں۔

پروونشل ڈیزاسٹر مینجمنٹ اتھارٹی (پی ڈی ایم ای) نے خیبرپختونخوا کے مختلف علاقوں میں وقفے وقفے سے بارشوں اور برفباری کی پیشگوئی کی ہے، تمام اضلاع کی انتظامیہ کو پیشگی اقدامات سے متعلق الرٹ رہنے کی ہدایت کی گئی ہے۔دوسری جانب برف باری کے باعث سردی میں اضافے کے بعد کئی علاقوں میں لکڑی کی قیمت میں بھی اضافہ ہوگیا دریں اثناء شہریوں نے سردی سے بچنے کیلئے گرم کپڑ نکال لئے ۔