یو ای ٹی لاہور کا انقلابی قدم،پاکستان کی پہلی چیئر آن پولیمر سسٹین ایبلٹی اینڈ سرکولیریٹی قائم

بدھ 17 دسمبر 2025 13:32

لاہور (اُردو پوائنٹ اخبارتازہ ترین - اے پی پی۔ 17 دسمبر2025ء) یو ای ٹی لاہور نے انقلابی قدم اٹھاتے ہوئے پاکستان کی پہلی چیئر آن پولیمر سسٹین ایبلٹی اینڈ سرکولیریٹی قائم کر دی۔اس مقصد کے لیے شعب پولیمر اینڈ پروسیس انجینئرنگ یو ای ٹی لاہور اور ملک کی چھ صفِ اول کی صنعتوں بشمولSPEL لمیٹڈ، پاک پیٹروکیمیکل لمیٹڈ، ٹی ایم ربرز پرائیویٹ لمیٹڈ، منہاس پائپس، آئی پاک اور جلانی پلاسٹکس کے مابین تاریخی مفاہمتی یادداشت پر دستخط کیے گئے۔

یہ منفرد اور دور رس اقدام پاکستان میں اپنی نوعیت کا پہلا ماڈل ہے،جس کے تحت متعدد نجی صنعتی اداروں نے مشترکہ طور پر ایک سرکاری جامعہ کے ساتھ ملکر سسٹین ایبلٹی،سرکولر اکانومی اور جدید پلاسٹکس انجینئرنگ کیلئے باقاعدہ تحقیقی و تدریسی چیئر قائم کی ہے۔

(جاری ہے)

یو ای ٹی لاہور کی جانب سے اس تاریخی معاہدے پر وائس چانسلر پروفیسر ڈاکٹر شاہد منیر نے دستخط کئے،جس سے جامعہ کے اس عزم کا اعادہ ہوتا ہے کہ یو ای ٹی صنعت و جامعہ کے باہمی اشتراک،عملی تحقیق اور پائیدار صنعتی ترقی میں قائدانہ کردار ادا کرتی رہے گی۔

معاہدے کے تحت شراکت دار صنعتی ادارے اس چیئر کی مکمل سرپرستی کریں گے،جس میں ایک پروفیسر اور دو عملے کے ارکان کی تنخواہوں کی مکمل فنڈنگ کے ساتھ ساتھ تحقیق و ترقی کیلئے مالی معاونت بھی شامل ہے۔یہ چیئر پلاسٹکس ری سائیکلنگ، سرکولیریٹی، پائیدار مواد،صنعتی فضلے کے موثر استعمال اور ماحول دوست مینوفیکچرنگ جیسے اہم شعبہ جات میں جدید تحقیق،ٹیکنالوجی ڈویلپمنٹ اور استعداد سازی پر کام کرے گی۔

معاہدے کی تقریب سے خطاب کرتے ہوئے وائس چانسلر نے کہا کہ اس چیئر کا قیام اکیڈمیا اور قومی صنعتی و ماحولیاتی ترجیحات کے درمیان ہم آہنگی کی جانب ایک انقلابی قدم ہے،جو نہ صرف معیاری تحقیق بلکہ ہنر مند افرادی قوت اور قابلِ عمل صنعتی حل فراہم کرے گا۔شریک صنعتی اداروں کے نمائندگان نے اس مشترکہ کاوش کو پائیدار ترقی کی جانب ایک مضبوط پیش رفت قرار دیتے ہوئے کہا کہ یہ اقدام تعلیمی جدت اور صنعتی عملدرآمد کے درمیان خلا کو پر کرے گا اور پاکستان کو قومی و عالمی سطح پر سسٹین ایبلٹی اہداف کے حصول میں مدد دے گا۔

چیئر آن پولیمر سسٹین ایبلٹی اینڈ سرکولیریٹی مستقبل میں قومی سطح پر تحقیقی اشتراک، پالیسی سازی میں معاونت،صنعت سے جڑی جدت اور نوجوان انجینئرز و محققین کی تربیت کا مرکز بنے گی اور یوں یو ای ٹی لاہور کو خطے میں پائیدار پلاسٹکس اور سرکولر اکانومی کے میدان میں ایک نمایاں قائدانہ مقام دلائے گی۔