جین ایڈیٹنگ انڈکشن کے استعمال سے فی ایکڑ زیادہ پیداوار کی حامل نئی اقسام کی تیاری میں جدت لائیں،سائنٹسٹ ڈاکٹر ساجدالرحمن

فیصل آباد (اُردو پوائنٹ اخبارتازہ ترین - اے پی پی۔ 17 دسمبر2025ء) پاکستان کے زرعی سائنسدان بائیو ٹیکنالوجی کے جدید بریڈنگ ٹولز جین ایڈیٹنگ انڈکشن کے استعمال سے مختلف فصلوں کی فی ایکڑ زیادہ پیداوار کی حامل نئی اقسام کی تیاری میں جدت لائیں اور ملکی فوڈ سکیورٹی کے حصول کو ممکن بنانے میں اپنا کردار ادا کریں۔ بدلتے موسمی حالات میں ملکی معیشت کی بحالی کے لئے زرعی شعبہ سے منسلک تمام سٹیک ہولڈرز مشترکہ پلیٹ فارم سے اپنی کاوشیں بروئے کار لائیں۔

پلانٹ بائیوٹیکنالوجی کے جدید ٹولزجینزایڈیٹنگ کے استعمال سے مختلف فصلوں، پھلوں،دالوں، سبزیوں اورچارہ جات کی نئی اقسام میں جینیاتی تبدیلیاں لائیں۔ جینیاتی تبدیلیوں کے ذریعے فصلوں کے ضرر رساں کیڑوں اور بیماریوں کو کنٹرول کرکے فصلوں کی فی ایکڑ پیداوار میں اضافہ ممکن ہے۔

(جاری ہے)

بائیو ٹیکنالوجی کے استعمال سے کم وقت میں فصلوں میں مثبت تبدیلیوں کو ممکن بنایا جاسکتا ہے جو روائتی افزائش نسل کے طریقوں سے ممکن نہیں ہے۔

ان مقاصد کے حصول کیلئے پبلک پرائیویٹ سیکٹر کو ایک پلیٹ فارم سے منظم ہوکر کوششیں کرنا ہوں گی۔چائنہ نے ریسرچ میں بائیو ٹیکنالوجی کے استعمال سے مختلف فصلوں کی پیداوار میں نمایاں اضافہ کیا ہے۔ دنیا کے ترقی یافتہ ممالک کی طرح پاکستان کے زرعی سائنسدانوں نے بھی ٹرانس جینک تکنیک سے ہائی ویلیو پودوں کی تیاری، جینیاتی طور پر تبدیل شدہ فصلوں کے ڈی این اے مارکر کی مدد سے ٹیسٹنگ کا عمل، ٹشو کلچر کے ذریعے مختلف فصلوں کے پودوں کی افزائش نسل میں کامیابی حاصل کی ہے- ان خیالات کا اظہار چیف سائنٹسٹ ڈاکٹر ساجدالرحمن نے ایوب زرعی تحقیقاتی ادارہ فیصل آباد اورزرعی یونیورسٹی فیصل آباد کے باہمی اشتراک سے دوروزہ نیشنل ڈائیلاگ آن بائیوٹیکنالوجی کے موقع پرشرکاء سے خطاب کرتے ہوئے کیا۔

چیف سائنٹسٹ ایگریکلچرل ریسرچ پنجاب ڈاکٹر ساجد الرحمن نے پروگرام میں مزید بتایا کہ ایوب زرعی تحقیقاتی ادارہ فیصل آباد کے مختلف شعبوں کے زرعی سائنسدان گندم، چاول، کپاس، گنا، تیلداراجنا س، دالوں، سبزیوں، پھلوں اور چارہ جات میں بہتری لانے کے لئے دنیاکے ترقی یافتہ ممالک میں ہونے والی جدید تحقیق سے استفادہ کرتے ہوئے زرعی تحقیق میں جدت لانے میں مصروف عمل ہیں۔ زرعی سائنسدان شبانہ روز تحقیقی کاوشوں کے ذریعے پودوں میں مثبت تبدیلیاں لا کر ضرر رساں کیڑوں اور بیماریوں سے پاک اقسام کے معیاری بیجوں کی تیاری اور کاشتکاروں کی دہلیز تک پہنچانے میں اپنا کردار احسن طریقے سے سرانجام دے رہے ہیں۔