پنجاب یونیورسٹی کے پرندے کیمپس کی خوبصورتی میں اضافہ کرتے ہیں‘پروفیسر ڈاکٹر محمد علی

جمعہ 30 جنوری 2026 17:40

لاہور (اُردو پوائنٹ اخبارتازہ ترین - این این آئی۔ 30 جنوری2026ء) وائس چانسلرپنجاب یونیورسٹی پروفیسرڈاکٹر محمد علی نے کہا ہے کہ پنجاب یونیورسٹی میں مختلف اقسام کے پرندوں کی بہتات ہے جس سے اس کی خوبصورتی میں اضافہ ہوتا ہے،ماحول اور پرندوں کو محفوظ بنانے کے لئے یونیورسٹی اساتذہ اپنا کردار ادا کر رہے ہیں۔ وہ پنجاب یونیورسٹی انسٹیٹیوٹ آف زوالوجی کے زیرِاہتمام منعقدہ ڈاکٹر بشریٰ نثار خان کی تصنیف ’برڈز آف یونیورسٹی آف دی پنجاب‘کی تقریبِ رونمائی سے خطاب کررہے تھے۔

اس موقع پر وائس چانسلریونیورسٹی آف میانوالی پروفیسرڈاکٹر ندیم شیخ،پرووائس چانسلرپروفیسر ڈاکٹرخالد محمود،ڈائریکٹر انسٹیٹیوٹ آف زوالوجی پروفیسرڈاکٹر نبیلہ روحی،پروفیسر ایمریٹس ڈاکٹراے آر شکوری، مصنفہ ڈاکٹر بشریٰ نثار خان ،فیکلٹی ممبران اور طلباؤ طالبات نے بڑی تعداد میں شرکت کی۔

(جاری ہے)

اپنے خطاب میں وائس چانسلرپروفیسر ڈاکٹر محمد علی نے کہا کہ اساتذہ کا کام صرف تدریس تک محدود نہیں ،بلکہ کتابوں کے ذریعے علم کو اگلی نسل تک منتقل کرنے میں بھی ان کا کردار اہم ہے۔

انہوں نے کہا کہ آبادی کا پھیلائو زراعت اور پرندوںکی افزائش کو متاثر کررہا ہے۔انہوں نے پنجاب یونیورسٹی میں پائے جانے والے پرندوں کے حوالے سے معلوماتی تصنیف پر مصنفہ کو مبارک باد پیش کی۔ پروفیسر ڈاکٹر خالد محمود نے کہا کہ محدود مالی وسائل کے باوجود پرندوں پر بہترین کتاب لکھنا اس بات کو ظاہر کرتاہے کہ ہمارے اساتذہ تدریس کے ساتھ قدرتی ماحول کو محفوط بنانے کے لئے بھی کردار ادا کررہے ہیں۔

انہوںنے کہا کہ پنجاب یونیورسٹی میں درختوں کی بہتات کے باعث گرمیوں میں بھی درجہ حرارت معتدل رہتا ہے۔پروفیسر ڈاکٹر آے آر شکور ی نے کہاکہ پنجاب یونیورسٹی دنیا کے خوبصورت تعلیمی اداروں میں شمار ہوتی ہے۔ انہوںنے یونیورسٹی میں پائے جانے والے پرندوں پر کتاب لکھنے کو اچھا آئیڈیا قرار دیا۔ ڈاکٹر نبیلہ روحی نے کہا کہ یہ کتاب پرندوں کی نسل کو محفوظ بنانے میں محققین کے لئے فائدہ مند ثابت ہوگی۔ ڈاکٹر بشریٰ نثار خان نے کہا کہ پنجاب یونیورسٹی میں پرندوں پر کتاب لکھنا ایک خواب تھا جو آج پورا ہوگیا۔ انہوں نے کتاب کے خدوخال بیان کرتے ہوئے بتایا کہ اس میں 105اقسام کے پرندوںپر تفصیلی معلومات طلبہ اور محققین کے لئے دلچسپی کاباعث بنے گی۔