انٹرمیڈیٹ امتحان 2026،داخلہ فارم جمع کرانے کے شیڈول میں توسیع، طلبہ و طالبات کو مزید مہلت مل گئی

جمعرات 12 فروری 2026 18:23

انٹرمیڈیٹ امتحان 2026،داخلہ فارم جمع کرانے کے شیڈول میں توسیع، طلبہ ..
راولپنڈی (اُردو پوائنٹ اخبارتازہ ترین - اے پی پی۔ 12 فروری2026ء) بورڈ آف انٹرمیڈیٹ اینڈ سیکنڈری ایجوکیشن راولپنڈی نے انٹرمیڈیٹ پارٹ ون، پارٹ ٹو اور کمپوزٹ (پہلا سالانہ) امتحان 2026 کے آن لائن داخلہ فارم جمع کرانے کے شیڈول میں توسیع کر دی ہے۔ اس اقدام کا مقصد طلبہ و طالبات اور تعلیمی اداروں کو سہولت فراہم کرنا ہے تاکہ تمام امیدوار مقررہ ضابطہ کار کے تحت بروقت اپنے داخلہ فارم جمع کروا سکیں۔

بورڈ کے ترجمان کے مطابق توسیع شدہ شیڈول کے تحت امیدوار سنگل فیس کے ساتھ اپنے داخلہ فارم 19 فروری 2026 تک جمع کروا سکتے ہیں، جبکہ دو گنا فیس کے ساتھ داخلہ فارم جمع کرانے کی آخری تاریخ 2 مارچ 2026 مقرر کی گئی ہے۔ اسی طرح تین گنا فیس کے ساتھ داخلہ فارم جمع کرانے کی آخری تاریخ 12 مارچ 2026 مقرر کی گئی ہے۔

(جاری ہے)

ترجمان نے مزید بتایا کہ وہ امیدوار جو مذکورہ تاریخوں تک داخلہ فارم جمع کرانے سے قاصر رہیں، وہ تین گنا فیس کے علاوہ 200 روپے یومیہ جرمانہ کے ساتھ 29 اپریل 2026 تک اپنے آن لائن داخلہ فارم جمع کروا سکتے ہیں۔

بورڈ حکام کے مطابق اس توسیع کا مقصد زیادہ سے زیادہ امیدواروں کو امتحانات میں شرکت کا موقع فراہم کرنا اور داخلہ فارم جمع کرانے کے عمل کو مزید آسان بنانا ہے۔بورڈ انتظامیہ نے تمام سرکاری و نجی تعلیمی اداروں کے سربراہان کو ہدایت جاری کی ہے کہ وہ اپنے اداروں کے امیدواران کے آن لائن داخلہ فارم مقررہ توسیع شدہ تاریخوں کے اندر مکمل کر کے جمع کروانے کو یقینی بنائیں تاکہ کسی بھی امیدوار کو امتحان میں شرکت سے محرومی کا سامنا نہ کرنا پڑے۔

متعلقہ عنوان :