محمد نواز شریف زرعی یونیورسٹی میں عالمی دن برائے پرتشدد انتہاپسندی کے تدارک پر علمی سیمینار اور پینل ڈسکشن کا انعقاد

جمعہ 13 فروری 2026 19:25

ملتان (اُردو پوائنٹ اخبارتازہ ترین - اے پی پی۔ 13 فروری2026ء) محمد نواز شریف زرعی یونیورسٹی کے سینئر ٹیوٹر آفس اور سٹوڈنٹ کونسل کے زیر اہتمام پرتشدد انتہاپسندی کے تدارک کے عالمی دن کے موقع پر ایک علمی سیمینار اور پینل ڈسکشن کا انعقاد کیا گیا۔سیشن کی صدارت وائس چانسلر پروفیسر ڈاکٹر آصف علی (تمغہ امتیاز) نے کی۔تقریب میں فیکلٹی اور طلبا و طالبات نے نوجوانوں میں تشدد اور انتہاپسندی کے بڑھتے ہوئے رجحانات کی وجوہات پر تفصیلی گفتگو کی۔

وائس چانسلر نے کہا کہ معاشرے میں برداشت اور رواداری کو فروغ دینے کے لیے مربوط اقدامات ناگزیر ہیں۔انہوں نے زور دیا کہ یونیورسٹی میں موجود پلیٹ فارمز، طلبہ کلبز اور اسپورٹس گراؤنڈز نوجوانوں کی مثبت توانائی کو تعمیری سمت دینے کے مؤثر ذرائع ہیں تاہم اس سے تمام طلبا و طالبات استفادہ نہیں کر رہے۔

(جاری ہے)

ڈاکٹر آصف علی نے مزید کہا کہ تدریسی انداز میں بہتری لا کر کلاس رومز میں ایسا ماحول بنایا جائے جہاں طلبہ سوال کرنے، مکالمہ کرنے اور اپنے خیالات پیش کرنے میں خود کو بااختیار محسوس کریں۔

انہوں نے طلبہ کو سننے اور اظہارِ رائے کے مواقع فراہم کرنے کی اہمیت پر بھی زور دیا اور سٹوڈنٹ کونسل کو ہدایت دی کہ وہ جامعہ میں مثبت مصروفیات کے فروغ کے لیے جامع منصوبہ (پلان) پیش کرے تاکہ طلبہ کی تعمیری شرکت کو مؤثر بنایا جا سکے۔تقریب کے اختتام پر اس عزم کا اعادہ کیا گیا کہ جامعہ نوجوانوں کی مثبت تربیت، بامعنی مکالمے اور شمولیتی تعلیمی ماحول کے ذریعے ایک پُرامن اور ہم آہنگ معاشرے کی تشکیل میں اپنا کردار جاری رکھے گی۔اس موقع پر ڈاکٹر حماد ندیم طاہر، ڈاکٹر ناصر ندیم، ڈاکٹر بنیامین رانا، ڈاکٹر عثمان جمشید، ڈاکٹر بابر فرید، ڈاکٹر رشید احمد، مس ایمن، اسود احمد اور مس شہزادی بھی موجود تھے۔