خیبر پختونخوا کے وزیر اعلی سہیل آفریدی کے خلاف انتخابی ضابطہ اخلاق کی خلاف کے کیس میں فیصلہ محفوظ

منگل 17 فروری 2026 22:45

اسلام آباد (اُردو پوائنٹ اخبارتازہ ترین - آن لائن۔ 17 فروری2026ء) الیکشن کمیشن نے خیبر پختونخوا کے وزیر اعلی سہیل آفریدی کے خلاف انتخابی ضابطہ اخلاق کی خلاف کے کیس میں فیصلہ محفوظ کرلیا۔منگل کو الیکشن کمیشن میں وزیراعلیٰ خیبر پختونخوا سہیل آفریدی کے خلاف ضابطہ اخلاق خلاف ورزی اور الیکشن عملے کو دھمکانے سے متعلق کیس کی چیف الیکشن کمشنر کی سربراہی میں پانچ رکنی بینچ نے سماعت کی۔

اس موقع پر درخواست گزار بابر نواز کے وکیل سجیل سواتی اور سہیل آفریدی کے وکیل علی بخاری پیش ہوئے۔ وکیل سجیل سواتی نے دلائل دیتے ہوئے بتایا کہ این اے 18 ہری پور ضمنی انتخاب کا شیڈول 8 اکتوبر 2025 کو جاری ہوا، اور انتخابی شیڈول سے کامیابی کے نوٹیفکیشن تک تمام معاملات الیکشن کمیشن کے دائرہ اختیار میں ہوتے ہیں۔

(جاری ہے)

انہوں نے کہا کہ ضمنی انتخاب سے چار روز قبل 19 نومبر 2025 کو وزیراعلیٰ نے چمبہ (ہری پور اور ایبٹ آباد بارڈر پر) میں عوامی اجتماع سے خطاب کیا اور 23 نومبر کو امتحان قرار دیتے ہوئے کہا کہ عمر ایوب کا مقابلہ ان کی اہلیہ سے ہے، اور اہلیہ زیادہ ووٹ لیں گی۔

وکیل نے کہا کہ وزیراعلیٰ نے پولیس اور انتظامیہ کو پیغام دیا کہ اگر 23 نومبر کو بدمعاشی ہوئی یا ووٹ تبدیل کیے گئے تو صبح کی روشنی اور رات کا اندھیرا نہیں دیکھیں گے۔ وکیل نے کہا کہ یہ دھمکی آمیز بیان الیکشن عملے اور ووٹروں پر دباؤ تھا، آئین، الیکشن ایکٹ اور ضابطہ اخلاق کی خلاف ورزی ہے۔ وزیراعلیٰ نے انتخابی مہم میں حصہ لیا جو آئین کے تحت ممنوع ہے، اور حلف کی بھی خلاف ورزی کی۔ انہوں نے آرٹیکل 218(3)، 233 اور 234 کا حوالہ دیا کہ الیکشن کمیشن کو وسیع اختیارات ہیں۔ اگر سہیل آفریدی کو چھوڑ دیا گیا تو غلط مثال قائم ہوگی، سماعت میں مزید دلائل سننے کے بعد فیصلہ محفوظ کر لیا گیا۔۔۔۔ اعجاز خان