پنجاب یونیورسٹی ڈیپارٹمنٹ آف پبلک ہیلتھ کے زیر اہتمام انیمیا فری بوتھ کا انعقاد

ہفتہ 21 فروری 2026 17:49

لاہور (اُردو پوائنٹ اخبارتازہ ترین - اے پی پی۔ 21 فروری2026ء) پنجاب یونیورسٹی ڈیپارٹمنٹ آف پبلک ہیلتھ کے زیر اہتمام اللہ والے ٹرسٹ اور ویل بیئنگ نیوٹریشن سوسائٹی کے اشتراک سے طلبہ میں آئرن کی کمی سے ہونے والی خون کی کمی (انیمیا) کے بارے میں آگاہی پیدا کرنے کے لیے انیمیا فری بوتھکا انعقاد کیاگیاجس میں معروف ماہرِ صحتِ عامہ پروفیسر ڈاکٹر روبینہ ذاکر، انچارج ڈیپارٹمنٹ آف پبلک ہیلتھ ڈاکٹر نعمان علی چوہدری،فیکلٹی ممبران اور طلبہ نے شرکت کی۔

اس موقع پر ڈاکٹر روبینہ ذاکر اور ڈاکٹر نعمان علی نے انیمیا سے پاک طالبعلم برادری کی تشکیل کے عزم کا اظہار کیا، جس میں بی ایس نیوٹریشن اینڈ ڈائیٹیٹکس کے چوتھے سمسٹر کے طلبہ نے بھرپور حصہ لیا۔اللہ والے ٹرسٹ کے شعبہ نیوٹریشن کی کوآرڈینیٹر زوہا اسلم نے ایک انٹرایکٹو آگاہی سیشن کا انعقاد کیا۔

(جاری ہے)

انہوں نے خصوصا نوجوان خواتین میں آئرن کی کمی سے پیدا ہونے والی خون کی کمی کی وجوہات، علامات اور طویل مدتی اثرات پر روشنی ڈالی۔

طلبہ کو آئرن سے بھرپور غذائوں اور احتیاطی تدابیر کے حوالے سے عملی رہنمائی بھی فراہم کی گئی۔اس موقع پر فوری اسکریننگ کیمپ بھی لگایا گیا جہاں طلبہ کے ہیموگلوبن ٹیسٹ مفت اور نتائج کی بنیاد پر انہیں مختصر انفرادی مشاورت فراہم کی گئی۔یہ اقدام آگاہی بڑھانے، بروقت تشخیص کی حوصلہ افزائی کرنے اور طلبہ کو اپنی غذائی صحت کی ذمہ داری لینے کی ترغیب دینے میں موثر ثابت ہوا۔اس سرگرمی نے نہ صرف احتیاطی صحت کی اہمیت کو اجاگر کیا بلکہ جامعہ اور سماجی تنظیموں کے درمیان تعاون کو بھی مضبوط بنایا۔