پنجاب یونیورسٹی فیکلٹی ممبر نے اٹلی میں بین الاقوامی ونٹرسکول مکمل کر لیا

ہفتہ 7 مارچ 2026 17:18

لاہور(اُردو پوائنٹ اخبارتازہ ترین - این این آئی۔ 07 مارچ2026ء) پنجاب یونیورسٹی ہیلی کالج آف کامرس کے لیکچرارحافظ فواد علی نے اٹلی کے شہر فلورنس میں منعقد ہونے والا پروگرام ’فیرینزے 12واں ونٹر سکول برائے ریسرچ میتھڈالوجی اِن سوشل سائنسز، اربن سٹڈیز اینڈ اسپیشل پلاننگ‘ کامیابی سے مکمل کر لیا۔ اس کے ساتھ ساتھ انہوں نے ’ٹریننگ سکول آن اپلائیڈ اونٹولوجی فار کنسیپچول اینالیسس اینڈ سسٹمیٹائزیشن ‘میں بھی شرکت کی۔

یہ پروگرام فلورنس کی یونیورسٹی ،ڈگلی سٹڈی ڈی فیرینزے کی میزبانی میں منعقد ہوا جسے یورپی اربن ریسرچ ایسوسی ایشن (یورا) اور اٹلی کی کئی جامعات کی معاونت حاصل تھی۔ اس پروگرام کا مقصد کلیدی لیکچرز، ورکشاپس اور تحقیقی طریقہ کار کی تربیت کے ذریعے تحقیقاتی صلاحیتوں کو فروغ دینا تھا۔

(جاری ہے)

ونٹر سکول کے دوران شرکاء کو کلاسیکی اور جدید تحقیقی طریقہ کار، عملی تجزیاتی آلات اور باہمی سیکھنے کی حکمت عملیوں سے روشناس کرایا گیا۔

یہ تربیت عالمی شہرت یافتہ سکالرز کی نگرانی میں منعقد کی گئی۔حافظ فواد علی کو اس پروگرام میں شرکت کے لیے منتظمین کی جانب سے مسابقتی گرانٹ بھی دی گئی۔ ان کی اس بین الاقوامی تربیت کی کامیاب تکمیل ان کے علمی تحقیق کو آگے بڑھانے اور عالمی تعلیمی روابط کو مضبوط بنانے کے عزم کی عکاسی کرتی ہے۔