بہاریہ مکئی کے نقصان دہ کیڑوں کابروقت انسداد نہ کیا جائے تو پیداوار میں خاطر خواہ کمی واقع ہوتی ہے،ڈاکٹر مقصود احمد

سیالکوٹ (اُردو پوائنٹ اخبارتازہ ترین - اے پی پی۔ 14 مارچ2026ء) ڈائریکٹر پیسٹ وارننگ و کوالٹی کنٹرول آف پیسٹی سائیڈز محکمہ زراعت (پلانٹ پروٹیکشن)ڈاکٹر مقصود احمد نے کہا ہے کہ بہاریہ مکئی کی فصل پربہت سے کیڑے حملہ آورہوتے ہیں اگران کابروقت انسداد نہ کیا جائے تو فصل کی پیداوار میں خاطر خواہ کمی واقع ہوتی ہے۔ بہاریہ مکئی کی فصل کو نقصان پہنچانے والے کیڑوں میں تنے کی سنڈی بڑی اہم ہے۔

یہ کیڑا پاکستان کے مکئی کا شت کرنے والے تمام علاقوں میں پا یا جاتاہے۔پروانے کا رنگ زردی مائل ہوتا ہے۔ انڈے چپٹے، بیضوی اور پیلے رنگ کے ہوتے ہیں۔ سنڈی کا رنگ گدلا سفید ہوتاہے اور جسم کے پچھلے حصہ پر چار بھورے رنگ کی لائنیں ہوتی ہیں۔پورے قد کی سنڈی تقریباً20 سے 25ملی میٹر لمبی ہوتی ہے۔

(جاری ہے)

اس کی مادہ پتوں کی نچلی سطح پر انڈے دیتی ہے جو پیلے رنگ کے ہوتے ہیں اور گچھوں کی شکل میں دیے جاتے ہیں۔

ایک مادہ اپنی زندگی کے دوران 2سے 12دن میں 300سے زائد انڈے دیتی ہے جن سے4یا 5 دن میں سنڈیاں نکل آتی ہیں۔ سنڈی پورے قد کی ہونے تک 6 حالتو ں سے گزرتی ہے۔ سنڈی کی حالت 14سے 28دن ہوتی ہے۔ پھر کویا کی حالت میں تبدیل ہوجاتی ہے۔ کویا عموماًتنے میں سوراخ کر کے بناتی ہے۔ کوئے سے 3ہفتوں کے بعد پروانے نکل آتے ہیں۔ یہ سنڈی مکئی کی فصل کو سب سے زیادہ نقصان پہنچاتی ہے۔

بعض صورتوں میں جب سنڈی کا حملہ زیادہ ہو تو فصل بالکل ہی تباہ ہوجاتی ہے ا س سنڈی کا حملہ اس وقت شروع ہوتاہے جب فصل تقریباً 4انچ کے قریب اونچی ہوتی ہے سنڈی تنے میں داخل ہو کر اس کی کونپل کو کاٹ دیتی ہے جس سے کونپل سوکھ جاتی ہے اس طرح پودے کی بڑھوتری رک جاتی ہے بعض اوقات یہ سنڈی مکئی کے نر حصہ پر بھی حملہ آور ہوتی ہے اور چھلیوں کو نقصان پہنچاتی ہے۔

بہاریہ مکئی پرسنڈی کا حملہ مارچ کے آخر یا اپریل کے شروع میں ہوتاہے۔ کاشتکاروں کو چاہیے کہ فصل کا باقاعدگی سے معائنہ کرتے رہیں۔متاثرہ پودوں کو کھیتوں سے نکال کر چارہ کے طور پر استعمال کریں۔ برداشت کے بعد متاثرہ فصل کے بچے کھچے حصوں کو روٹا ویٹ کر دیں۔رات کو روشنی کے پھندے لگا کر پروانے تلف کریں۔فصلوں کا مناسب ہیر پھیر کریں۔فصل کی برداشت کے بعد مڈھوں کو کھیت سے نکال کر زمین میں دبا دیں۔

فصل میں موجود جڑی بوٹیوں کا بر وقت تدارک کریں ،سست تیلاموسم بہار میں کونپل کی مکھی کے فوراًبعد حملہ کرتاہے۔ شدید حملہ کی صورت میں فصل کو کافی نقصان پہنچتاہے۔ سست تیلاپتوں کا رس چوستاہے جس سے پتوں پر سفید نشان بن جاتے ہیں اور پتے آہستہ آہستہ سوکھنا شروع ہوجاتے ہیں۔ شدید حملہ کی صورت میں اوپر والے چند پتوں کے علاوہ باقی سب پتے سوکھ جاتے ہیں اور پیداوار میں کمی واقع ہوجاتی ہے۔

چست تیلہ چھلیاں بننے سے کچھ عرصہ قبل حملہ آور ہوتاہے اور پتوں کا رس چوستاہے۔چست تیلا کا حملہ عموماًاوپر والے پتوں اور نر حصہ پر زیادہ ہوتاہے۔ شدید حملہ کی صورت میں فصل کی عمل زیرگی میں خاصی کمی واقع ہوجاتی ہے جس سے پیداوار بھی متا ثر ہو تی ہے۔تیلے کے حملہ سے بچاؤ کے لیے محکمہ زراعت کے مقامی عملہ کے مشورہ سے سپرے کریں۔ لشکری سنڈی تمباکو، برسیم اور کپاس کی موذی دشمن ہے لیکن گزشتہ چند سالوں سے اس کا حملہ مکئی پر بھی بڑھ رہا ہے۔

اس کیڑے کی سنڈیاں بڑی تعداد میں فصل پر حملہ آور ہوتی ہیں اور پودوں کے پتے بھیڑوں کی طرح کا ٹ کر کھاجاتی ہیں۔ شدید حملہ کی صورت میں یہ سنڈیاں پتوں کو چٹ کر جاتی ہیں اور صرف تنا باقی رہ جاتاہے۔ بعض اوقات لشکری سنڈی بھٹے کے بالوں کو بھی کاٹ دیتی ہے اور چھلی میں داخل ہو کر دانوں کو نقصان پہنچاتی ہے۔ شدید حملہ کی صورت میں پیدا وار میں کمی واقع ہوجاتی ہے۔ کاشتکاروں کو چاہیے کہ لشکری سنڈی کے انسداد کے لیے محکمہ زراعت کے مقامی عملہ کے مشورہ سے سپرے کریں اور زہر پاشی کے بعد فصل کو پانی لگائیں۔