میٹرک بورڈ کا پرچے کے عوض رقم مانگنے والے سینٹرز کی رجسٹریشن منسوخ کرنے کا حکم

ہفتہ 11 اپریل 2026 21:35

کراچی(اُردو پوائنٹ اخبارتازہ ترین - این این آئی۔ 11 اپریل2026ء) میٹرک بورڈ نے پرچے کے عوض رقم مانگنے والے سینٹرز کی رجسٹریشن منسوخ کرنے کا حکم دیتے ہوئے والدین کو شکایات درج کرانے کے لیے ہیلپ لائن نمبر جاری کر دیا۔تفصیلات کے مطابق ثانوی تعلیمی بورڈ کراچی کے تحت نویں اور دسویں جماعت کے سالانہ امتحانات کا دوسرا روز مکمل ہو گیا ہے۔ جہاں ایک طرف امتحانی عمل کو شفاف بنانے کے لیے سخت اقدامات کیے گئے ہیں، وہیں بورڈ نے بدعنوانی کی شکایات پر سخت ایکشن لینے کا بھی اعلان کیا ہے۔

ترجمان تعلیمی بورڈ نے کہا کہ بعض امتحانی مراکز کی انتظامیہ کی جانب سے طلبہ سے پرچے کے عوض رقم طلب کرنے کی شکایات موصول ہوئی ہیں۔بورڈ انتظامیہ نے اس سنگین معاملے کا نوٹس لیتے ہوئے فوری کارروائی کا حکم دیا ہے ، ایسے تمام مراکز جو اس غیر قانونی سرگرمی میں ملوث پائے گئے، ان کی رجسٹریشن فوری طور پر منسوخ کر دی جائے گی۔

(جاری ہے)

بورڈ نے والدین اور طلبہ سے اپیل کی ہے کہ ایسی شکایات کی فوری اطلاع 021-99260264 یا 021-99260284 پر دیں۔

ہفتہ کی صبح کی شفٹ میں نویں جماعت کے کمپیوٹر اسٹڈیز کا پرچہ منعقد ہوا، جس کے لیے درج ذیل انتظامات کیے گئے تھے، شہر کے 18 ٹانز میں قائم 521 مراکز پر تقریبا 3 لاکھ 85 ہزار سے زائد طلبہ امتحانات میں شریک ہیں۔امتحانی پرچوں کی ترسیل کے لیے 25 حب (Hubs) بنائے گئے ہیں۔ بورڈ افسران کی نگرانی میں پرچے مراکز تک پہنچائے گئے اور جوابی کاپیاں سیل کر کے بورڈ آفس واپس لائی گئیں۔

امتحانی مراکز کے اطراف دفعہ 144 نافذ کرنے کے لیے متعلقہ اداروں کو خط لکھ دیا گیا ہے۔ مراکز کے قریب فوٹو اسٹیٹ مشینیں بند رکھنے اور طلبہ کو موبائل فون لانے پر سخت پابندی عائد ہے۔بورڈ حکام نے کہاکہ وہ امتحانی عمل کے دوران مکمل وقت مراکز پر موجود رہ کر نقل مافیا اور بیرونی مداخلت کی روک تھام کو یقینی بنا رہے ہیں۔

Facebook Twitter Google + Share on Whatsapp

میٹرک بورڈ کا پرچے کے عوض رقم مانگنے والے سینٹرز کی رجسٹریشن منسوخ کرنے کا حکم

متعلقہ عنوان :

مزید تعلیم کی خبریں