کراچی: بحریہ یونیورسٹی ہیلتھ سائنسز کیمپس کی 12ویں کانووکیشن، 282 طلبہ میں ڈگریاں تقسیم

کراچی (اُردو پوائنٹ اخبارتازہ ترین - این این آئی۔ 25 اپریل2026ء) بحریہ یونیورسٹی ہیلتھ سائنسز کیمپس کراچی کی 12ویں کانووکیشن تقریب ہفتہ کو ابنِ سینا آڈیٹوریم میں منعقد ہوئی، جس میں مجموعی طور پر 282 فارغ التحصیل طلبہ و طالبات میں ایم فل، ایم بی بی ایس، بی ڈی ایس، ڈی پی ٹی، بی ایس نرسنگ اور ایم ایل ٹی کی ڈگریاں تقسیم کی گئیں، جبکہ نمایاں کارکردگی دکھانے والے طلبہ کو میڈلز اور میرٹ سرٹیفکیٹس سے نوازا گیا۔

کانووکیشن تقریب دو سیشنز پر مشتمل تھی۔ صبح کے سیشن کی صدارت مہمانِ خصوصی وائس ایڈمرل عابد حمید، ہلالِ امتیاز (ملٹری)، ریکٹر بحریہ یونیورسٹی نے کی، جبکہ دوپہر کے سیشن کی صدارت وائس چانسلر ڈا ؤیونیورسٹی آف ہیلتھ سائنسز پروفیسر نازلی حسین نے کی۔تقریب کا آغاز تلاوتِ کلامِ پاک اور درودِ ابراہیمی سے ہوا۔

(جاری ہے)

اس موقع پر ڈائریکٹر جنرل، ڈین، ڈائریکٹرز، پاک بحریہ کے اعلی حکام، رجسٹرار بحریہ یونیورسٹی، میڈیکل، ڈینٹل اور الائیڈ ہیلتھ سائنسز سے وابستہ ممتاز شخصیات، اساتذہ، طلبہ اور والدین نے بڑی تعداد میں شرکت کی۔

فارغ التحصیل طلبہ سے حلف ڈین ہیلتھ سائنسز پروفیسر ڈاکٹر شازیہ شکور نے لیا، جس کے بعد ریکٹر بحریہ یونیورسٹی وائس ایڈمرل عابد حمید نے نمایاں پوزیشن حاصل کرنے والے طلبہ و طالبات میں گولڈ اور سلور میڈلز، میرٹ سرٹیفکیٹس اور انعامات تقسیم کیے۔صبح کے سیشن سے خطاب کرتے ہوئے وائس ایڈمرل عابد حمید نے فارغ التحصیل طلبہ کو مبارکباد دیتے ہوئے کہا کہ آج کا دن طلبہ اور ان کے والدین کی مشترکہ محنت، قربانیوں اور عزم کا ثمر ہے۔

انہوں نے کہا کہ والدین کی غیر متزلزل حمایت طلبہ کی کامیابی میں بنیادی کردار ادا کرتی ہے۔انہوں نے کہا کہ تعلیمی زندگی سے پیشہ ورانہ ذمہ داریوں کی جانب یہ ایک اہم مرحلہ ہے، اس لیے گریجویٹس دیانتداری، پیشہ ورانہ اخلاقیات اور مسلسل سیکھنے کے جذبے کو اپنا شعار بنائیں۔ انہوں نے گولڈ اور سلور میڈلسٹس کی خصوصی حوصلہ افزائی بھی کی۔دوپہر کے سیشن سے خطاب کرتے ہوئے وائس چانسلر ڈاؤ یونیورسٹی پروفیسر نازلی حسین نے فارغ التحصیل طلبہ اور ان کے اہلِ خانہ کو مبارکباد دیتے ہوئے کہا کہ ہیلتھ سائنسز کے شعبے کا انتخاب دراصل انسانیت کی خدمت کا راستہ اختیار کرنا ہے۔

انہوں نے کہا کہ نوجوان ڈاکٹرز اور ہیلتھ پروفیشنلز اپنے کیریئر کا آغاز تجسس، دیانتداری اور اعلی اخلاقی اقدار کے ساتھ کریں۔انہوں نے کہا کہ قومی ترقی کے لیے تعلیم کے میدان میں پاک بحریہ کا کردار قابلِ تحسین ہے۔ پی این ایس شفا کی طبی مہارت کے تعاون سے بحریہ یونیورسٹی ہیلتھ سائنسز کیمپس طبی تعلیم، تحقیق اور تربیت کا ایک ممتاز ادارہ بن چکا ہے، جو اس کی فیکلٹی اور انتظامیہ کی بصیرت افروز قیادت کا ثبوت ہے۔

اس موقع پر نمایاں سابق طلبہ ڈاکٹر عین الاکبر (ایم بی بی ایس)اور ڈاکٹر فرح جاوید (بی ڈی ایس)نے بھی خطاب کیا اور بحریہ یونیورسٹی کے اعلی تعلیمی معیار کو سراہتے ہوئے کہا کہ ادارے نے انہیں پیشہ ورانہ مہارت، مضبوط کردار اور دیانتداری جیسی بنیادی اقدار سے آراستہ کیا۔تقریب کے اختتام پر ڈائریکٹر جنرل بی یو ایچ ایس سی وائس ایڈمرل اطہر مختار، ہلالِ امتیاز (ملٹری)ریٹائرڈ نے ریکٹر بحریہ یونیورسٹی کو کانووکیشن سووینئر پیش کیا، جبکہ دوسرے سیشن میں ریکٹر بحریہ یونیورسٹی نے پروفیسر نازلی حسین کو یادگاری شیلڈ پیش کی۔