19ویں سالانہ میلادِ مصطفیٰ ﷺ کانفرنس بسلسلہ تحفظ ختمِ نبوت کی تیاریاں عروج پر، جامع مسجد جھنڈگراں میں روح پرور اجتماع منعقد ہو گا

مظفرآباد (اُردو پوائنٹ اخبارتازہ ترین - این این آئی۔ 05 مئی2026ء) 19ویں سالانہ میلادِ مصطفیٰ ﷺ کانفرنس بسلسلہ تحفظ ختمِ نبوت کی تیاریاں عروج پر، جامع مسجد جھنڈگراں میں روح پرور اجتماع منعقد ہوگا،مظفرآباد کے نواحی علاقے یونین کونسل جھنڈگراں، حلقہ نمبر 5 کھاوڑہ میں بزمِ رضا مصطفیٰ کے زیرِ اہتمام 19ویں سالانہ میلادِ مصطفیٰ ﷺ کانفرنس بسلسلہ ناموسِ رسالت اور تحفظ ختمِ نبوت کے عنوان سے منعقد کیے جانے کے سلسلے میں تیاریاں اپنے آخری مراحل میں داخل ہو چکی ہیں۔

اس عظیم الشان روحانی اجتماع کے انعقاد کے لیے مختلف انتظامی،استقبالیہ، سیکیورٹی اور میڈیا کمیٹیاں تشکیل دے دی گئی ہیں۔تفصیلات کے مطابق کھاوڑہ حلقہ 5 میں بابرکت کانفرنس 10 مئی بروز اتوار جامع مسجد جھنڈگراں نزد ہائیر سیکنڈری سکول میں منعقد ہوگی، جس میں علاقے بھر سمیت گردونواح سے عاشقانِ رسول ﷺ شریک ہونگے۔

(جاری ہے)

کانفرنس میں جید علماء کرام، مشائخ عظام اور ممتاز ثناء خواںانِ رسول ﷺ شرکت کریں گے، جو سیرتِ طیبہ، ختمِ نبوت اور ناموسِ رسالت جیسے اہم موضوعات پر روشنی ڈالیں گے۔

کانفرنس سے عالمی مبلغ اسلام و سجادہ نشین دربار آستانہ چورہ شریف پیر سید سعادت علی شاہ خصوصی خطاب کریں گے،سجادہ نشین آستانہ عالیہ مکھیالہ شریف پیر سید وقار حسین شاہ کی زیر صدارت منعقدہ کانفرنس میں سجادہ نشین آستانہ عالیہ قادریہ بکوٹ شریف صاحبزادہ پیر سید حسین احمد بکوٹی مہمان خصوصی ہوں گے، علماء کرام اپنے خطابات میں موجودہ دور میں عقیدہ? ختمِ نبوت کی اہمیت، سیرتِ رسول ﷺ کی پیروی اور امتِ مسلمہ کو درپیش چیلنجز پر تفصیلی گفتگو کریں گے۔

تقریب میں کشمیر کے معروف نعت خواں راجہ عمر شہزاد،محمد عزیز قادری سمیت دیگر نامور ثناء خواںانِ رسول ﷺ بارگاہِ رسالت مآب ﷺ میں نذرانہ? عقیدت پیش کریں گے۔منتظمِ کانفرنس حافظ اطہر علی چشتی نے بتایا کہ اس بابرکت اجتماع کے لیے خصوصی انتظامات کیے جا رہے ہیں، انہوں نے عاشقانِ رسول ﷺ سے بھرپور شرکت کی اپیل کرتے ہوئے کہا کہ روحانی محافل ایمان کو تازگی بخشتی ہیں اور ہمیں سیرتِ مصطفیٰ ﷺ پر عمل پیرا ہونے کا درس دیتی ہیں۔کانفرنس کا آغاز صبح 8 بجے ہوگا اور نمازِ ظہر تک جاری رہے گی، جبکہ اختتام پر تمام شرکاء کے لیے لنگر کا وسیع انتظام بھی کیا گیا ہے۔ کانفرنس مذہبی و روحانی بیداری کے فروغ اور عقیدہ? ختمِ نبوت کے تحفظ کے لیے ایک اہم سنگِ میل ثابت ہوگی۔