سکواش کھلاڑی محمد آشاب عرفان نے سی آئی بی پام ہلز پی ایس اے ورلڈ چیمپئن شپ 2026 کے دوسرے راؤنڈ میں جگہ بنا لی

ہفتہ 9 مئی 2026 21:28

اسلام آباد (اُردو پوائنٹ اخبارتازہ ترین - اے پی پی۔ 09 مئی2026ء) پاکستان کے ابھرتے ہوئے سکواش کھلاڑی محمد آشاب عرفان نے شاندار کارکردگی کا مظاہرہ کرتے ہوئے سی آئی بی پام ہلز پی ایس اے ورلڈ چیمپئن شپ 2026 کے دوسرے راؤنڈ میں جگہ بنا لی جہاں انہوں نے سوئٹزرلینڈ کے نکولس مولر کو شکست دی۔ورلڈ نمبر 46 آشاب نے ورلڈ نمبر 28 نکولس مولر کو یکطرفہ مقابلے میں 0-3 سے شکست دی۔

اس میچ کے اسکور 13-11، 11-9 اور 11-0 رہے، اور یہ مقابلہ تقریباً 30 منٹ تک جاری رہا۔

(جاری ہے)

اس کامیابی کے ساتھ آشاب عرفان نے اپنے ہم وطن کھلاڑی نور زمان کے ساتھ دوسرے راؤنڈ میں رسائی حاصل کر لی ہے، جس سے ایونٹ میں پاکستان کی امیدیں برقرار ہیں۔آشاب نے میچ کے دوران بہترین کنٹرول، جارحانہ کھیل اور غیر معمولی اعتماد کا مظاہرہ کیا۔ خاص طور پر تیسرے گیم میں انہوں نے مکمل برتری دکھاتے ہوئے حریف کو ایک بھی پوائنٹ حاصل کرنے کا موقع نہیں دیا۔

اب آشاب کا مقابلہ دوسرے راؤنڈ میں انگلینڈ کے ورلڈ نمبر 9 مرون الشوربجی یا ورلڈ نمبر 49 نیتھن لیک میں سے کسی ایک کے ساتھ اتوار کو ہوگا۔دوسری جانب پاکستان کے نور زمان جو ورلڈ نمبر 28 ہیں بھی دوسرے راؤنڈ میں مصر کے محمد زکریا (ورلڈ نمبر 8) کے خلاف اتوار ہی کو میدان میں اتریں گے۔