محکمہ سپورٹس، یوتھ اینڈ کلچر کے زیر اہتمام آزاد جموں و کشمیر انڈر 23 فٹ بال چیمپئن شپ کا باقاعدہ آغاز ہ

چیمپئن شپ میں آزاد کشمیر کے 10 اضلاع کی ٹیمیں حصہ لے رہی ہیں جبکہ میچز 14 مئی تک مظفرآباد میں کھیلے جائیں گے

پیر 11 مئی 2026 14:55

مظفرآباد(اُردو پوائنٹ اخبارتازہ ترین - این این آئی۔ 11 مئی2026ء) محکمہ سپورٹس، یوتھ اینڈ کلچر کے زیر اہتمام آزاد جموں و کشمیر انڈر 23 فٹ بال چیمپئن شپ کا باقاعدہ آغاز ہو گیا۔ چیمپئن شپ کی افتتاحی تقریب خورشید الحسن خورشید فٹ بال اسٹیڈیم مظفرآباد میں منعقد ہوئی، جس کے مہمانِ خصوصی سیکرٹری سپورٹس، یوتھ اینڈ کلچر انصر یعقوب تھے۔ اس موقع پر ڈائریکٹر جنرل سپورٹس ملک شوکت حیات، ڈائریکٹر یوتھ اینڈ کلچر محمد نعمت اللہ عباسی، ڈائریکٹر سپورٹس افتخار صادق، صدر آل آزاد کشمیر فٹ بال ایسوسی ایشن مرزا امتیاز سمیت محکمہ سپورٹس کے افسران، فٹ بال ایسوسی ایشن کے عہدیداران،کھلاڑیوں اور شائقین کی بڑی تعداد نے شرکت کی۔

سیکرٹری سپورٹس انصر یعقوب نے فٹ بال کو کک لگا کر ٹورنامنٹ کا باضابطہ افتتاح کیا۔

(جاری ہے)

چیمپئن شپ میں آزاد کشمیر کے 10 اضلاع کی ٹیمیں حصہ لے رہی ہیں جبکہ میچز 14 مئی تک مظفرآباد میں کھیلے جائیں گے۔ افتتاحی تقریب سے خطاب کرتے ہوئے سیکرٹری سپورٹس یوتھ اینڈ کلچر انصر یعقوب نے کہا کہ جن معاشروں میں کھیل کے میدان آباد ہوتے ہیں وہاں ہسپتال ویران ہو جاتے ہیں۔

انہوں نے کہا کہ کھیلوں کی سرگرمیوں میں کمی کے باعث بچوں کی صحت متاثر ہو رہی ہے، لہٰذا اس نوعیت کے ٹورنامنٹس نہ صرف صحت مند سرگرمیوں کو فروغ دیتے ہیں بلکہ نوجوانوں میں اسپورٹس مین سپرٹ بھی پیدا کرتے ہیں۔انہوں نے مزید کہا کہ حکومت نوجوانوں کو مثبت سرگرمیوں کی جانب راغب کرنے کے لیے کھیلوں کے فروغ پر خصوصی توجہ دے رہی ہے اور مختلف اضلاع میں کھیلوں کے انفراسٹرکچر کو بہتر بنایا جا رہا ہے۔

ان کا کہنا تھا کہ تعلیمی اداروں کی سطح پر باقاعدگی سے کھیلوں کے مقابلوں کا انعقاد ناگزیر ہے تاکہ نئی صلاحیتوں کو اجاگر کیا جا سکے۔ انہوں نے واضح کیا کہ باصلاحیت کھلاڑیوں کو میرٹ کی بنیاد پر آگے لایا جائے گا اور انہیں قومی سطح تک رسائی دلانے کے لیے ہر ممکن سہولیات فراہم کی جائیں گی۔سیکرٹری سپورٹس نے مزید اعلان کیا کہ فٹ بال ٹورنامنٹ کے بعد جون میں راولاکوٹ میں ہاکی ٹورنامنٹ کا انعقاد کیا جائے گا۔ انہوں نے شہریوں سے اپیل کی کہ وہ ٹورنامنٹ کے مقابلوں میں بھرپور شرکت کریں اور نوجوان کھلاڑیوں کی حوصلہ افزائی کر کے صحت مند معاشرے کے قیام میں اپنا کردار ادا کریں۔